По три децении од појавувањето на 205 GTi, марката со лавот го претставува јубилејното издание на 208 GTi како модерно толкување на легендарниот тркач. Продажбата стартува во ноември, под хаубата се стискаат 208 КС.
Peugeot открива уште една премиера за настап на домашен терен на салонот во Париз. Peugeot 208 GTi 30th се појавува во чест на триесетгодишнината од 205 GTi и за одбрана на честа вози со 1,6-литарски бензинец со турбонатполнење и директно впрскување со 208 КС, но со вртежен момент зголемен на 300 њутнметри – секако со исполнување на нормата Euro 6. Силата се пренесува на предните тркала преку шестстепен мануелен менувач, во комбинација со торсен-диференцијал и специјално дотерано подвозје, заради оптимална тракција.
Спортскиот карактер и самоувереноста на малечкиот тркач се дополнително нагласени со двобојната каросерија. На 13-ти март годинава, што значи по неполна година од почетокот на продажбата, од фабриката на Peugeot излезе десетилјадитиот примерок од Peugeot 208 GTi, што го потврди успехот на спортскиот GTi и повисокото позиционирање на моделот 208 во конкуренцијата во класата.
Подвозјето е спуштено 10 милиметри, трагата напред е поширока за 22, назад за 16 милиметри. Хромираните детали од 208 GTi, во јубилејниот модел се изведени во мат црна боја, заради нагласување на спортскиот карактер. Во истиот финиш се изработени и праговите, заради нагласување на спуштената каросерија, исто како и арките во крилата, под коишто ѕиркаат бандажи од 18 инчи. Соодветно на мисијата, сопирачките клешти се лакирани во црвена боја.
Спринтот до сто трае 6,5 секунди, еден километар од место трае 26,5 секунди, меѓузабрзувањето во 5-от степен од 80 до 120 km/h завршува за 6 секунди.