Дарко Јаконов
Opel ја повикува актуелната генерација на Astra во сервис заради проблеми со ладењето на моторот. Во најлош случај може да се запали моторот. Проблемот е во лабавиот пластичен капак.
Марката со молњата во маската ги повикува во сервис сите примероци од актуелната моделска генерација на Astra (Astra J) со бензински мотор, коишто се произведени во периодот меѓу 2010 и 2012 година. Постои опасност вентилаторот на моторот да се блокира поради лабавиот капак на акумулаторот, по што следува прегревање на моторот поради недоволно ладење, а на крајот и можен пожар во возилото.
Поправката во сервисните работилници ќе се одвива во три чекори. Прво ќе се отстранува капакот на акумулаторот, потоа ќе се монтира дополнителен адаптер за каблите. Интервенцијата ќе трае половина час.
Со тоа Astra J се надоврзува на несреќната кариера на претходникот. Astra H (од 2004 година) имаше проблеми со турбополначите (1,9-литарскиот дизел до септември 2006), со контролната електроника на моторот (дизели и бензинци до ноември 2005), прскалки (1,6-литарски бензинец до октомври 2004), софтверот за регенерација на филтер за честички чад (дизели до ноември 2007), вентили за рециркулација на издувни гасови (бензинци до декември 2005, 1,9-литарски дизел со септември 2006) и електриката (пресилната струја на полнење ги оштетуваше акумулаторите – кај 1,9-литарскиот дизел со септември 2006). На крајот, стартерот продолжуваше со работа кај 1,6-литарските бензинци до октомври 2005 и 1,7-литарските дизели до септември 2007).
