Малата и фина британска мануфактура Morgan уште ги произведува автомобилите како во 1930-те години. Современата техника сепак пристига и таму. Турбо моторот е од BMW, челичната шасија е заменета со алуминиумска.
Ново историско поглавје за една од малкуте мануфактури што изработуваат автомобили со дизајн од 1930-те и со тоа продолжуваат да ја одушевуваат сцената. Morgan го најавува новиот Plus Four, со алуминиумска шасија и со турбо-бензинец од BMW со 258 КС.
Новиот модел доаѓа на местото на Morgan Plus 4, автомобилот што Британците почнаа да го произведуваат во 1950 и во последните седум децении беше јадро на марката. Колку оваа компанија се држи до традицијата, доволно кажува тоа што единствената промена во името е замената на нумеричкото „4“ со зборот „Four“.
Единствениот изглед на родстерот не се смени, но поинаку е под каросеријата. Според Morgan, дури 97 проценти од деловите се нови. Челичната рамка е заменета со алуминиумска платформа, иста каква што пред кусо време доби и новиот Plus Six. Тежината е смалена, крутоста зголемена, возните својства профитираат најмногу. Меѓуоскиното растојание е исто со „шестцилиндарскиот“ Plus Six, но Plus Four е потесен за 8 сантиметри.
Мотор, волан, седиште, тркала, тоа е се’ што е потребно во еден автомобил. И возач што ќе ужива во возењето
Моторот е BMW, дволитарски турбо со 258 КС. Спринтот од место до темпо сто трае само 4,8 секунди, крајната брзина изнесува 240 km/h. Тоа се перформанси споредливи со 3,7-литарскиот V6 во Morgan Roadster, којшто наскоро заминува од понудата. Првпат се нуди избор на 8-степен автоматски менувач со рачки зад воланот. Емисијата на СО2 од 159 g/km за варијантата со шестстепен мануелен менувач е смалена за 30% во споредба со претходникот.
Во кабината има повеќе простор, багажникот исто така е зголеме. Досега невидени ставки во опрeмата се централна брава, диодни предни и задни светла, АВЅ. Меѓу бројните нови опции се наоѓа и радио со блутут.
Како и досега, автомобилите се склопуваат строго рачно од избрани мајсторки и мајстори во фабриката во Малверн. Покрај алуминиум, се користат многу и јасеново дрво и кожа. Plus Four тежи 1.009 килограми. Тоа е воедно и главната одлика на овие автомобили, единственото чувство во возењето.
Автомобилот што требаше да биде изложен на салонот во Женева веќе се наоѓаше на пат, кога организаторите го откажаа салонот, поради висурот корона. Традиција на Morgan е салонските автомобили да се возат до салоните. Место тоа, несудениот салонски автомобил се врати на островот и премиерата се одржа во седиштето на компанијата, во Малверн.
Цената во Велика Британија изнесува 63.995 фунти, односно околу 59.000 евра.