Mitsubishi денес го одбележа извозот на четиримилионитиот автомобил од својата производствена мрежа во Тајланд. Станува збор за три фабрики за возила и една фабрика за мотори во земјата, во коишто лани беа произведени 440.000 возила.
Mitsubishi го основаше својот огранок во Тајланд во 1961 година и беше прв автомобилски производител што стартуваше со извоз оттаму во 1988 година. Лани во трите автомобилски фабрики во провинцијата Чонбури се произведоа 440.000 возила, од кои за извоз заминаа близу 80 проценти. Mitsubishi Motors Thailand моментно вработува повеќе од 7.000 лица и уште илјадници други во погоните на добавувачите.
Тајланд е најголема производствена локација на Mitsubishi надвор од Јапонија. Неодамна во Англија пристигна првиот бродски контингент од новиот пикап Mitsubishi L200. Испораките за најголемите европски пазари ќе стартуваат веќе во август.
Производственото портфолио се состои од моделите Space Star, L200 и Pajero Sport. Во Тајланд се произведува и верзијата на пикапот L200 под логото на Fiat и под моделското име Fullback.