По две години од премиерата на кросоверот со хибриден погон во Париз, Mitsubishi на истото место ќе го прикаже концептот на можната дополнителна верзија на овој модел.
На претстојниот салон во Париз, Mitsubishi ќе прикаже дизајнерска студија со којашто го испитува теренот на пазарот за воведување на дополнителна моделска верзија со техниката од Outlander PHEV, којашто ќе стави поголем нагласок на динамичниот дизајн и на перформансите на хибридната техника на марката.
Студијата Outlander PHEV Concept-S поседува „спортска и софистицирана нота“ во дизајнот, на што се однесува и буквата S во ознаката, посочувајќи на комбинацијата од погон на сите тркала реализирана со бензинец и два електромотора, како и на високиот комфор во возење и солидните својства за возење на терен на техниката на Mitsubishi. Засега јапонскиот специјалист за теренци и брзи машини ги открива само контурите на студијата од Париз, без подробности околу новитетите во техниката.