По пojaвувањето на новитe Ford Focus и Kia Ceed, годинава следи уште една важна премиера во компакт класата. Mazda 3 пристига со нов дизајн, нов кокпит, но и револуционерна моторна техника
Уште две седмици остануваат до премиерата на новата генерација на Mazda 3. Јапонскиот компакт ќе биде претставен на салонот во Лос Анџелес, кој се одржува од 30-ти ноември до 9-ти декември. Во меѓувреме почнаа да се појавуваат и фотографии од тест-прототипите, кои јасно укажуваат на тоа дека серискиот модел речиси целосно го презема дизајнот на Kai Concept од салонот во Токио пред две години.
Четвртата генерација на наследникот на „фантомот“ добива голема предна маска, којашто тенките светла дополнително ја нагласуваат. Каросеријата има мазна форма, долниот раб на страничните прозорци се искачува и придонесува опашот да изгледа особено моќно и цврсто. Задното стакло е повеќе заоблено, но и натаму е со релативно мали димензии.
Производителот официјално има објавено само една фотографија од серискиот модел, на којашто се гледа масивниот заден столб на комбилимусинската верзија и линијата на покривот на лимузинската изведба. Освен фотографијата постои и кусо фабричко видео. На него се наѕира страничната силуета на верзијата на Mazda 3 со пет врати, како и детал од задните светла.
Продажбата новата Mazda 3 на европскиот пазар стартува во следната пролет
Ентериерот на концептот е премногу футуристички да се примени во серискиот модел, особено со четирите одвоени седишта и масивниот средишен тунел како во суперспортските купеа. Сепак може да се приоменат неколку елементи од арматурната табла, којашто дизајнерите на Mazda ја нарекуваат Skyactiv-Vehicle.
Многу поинтересни новитети се очекуваат под хаубата, кадешто се најавени мотори од генерацијата Skyactiv-X. Станува збор за бензински мотори, коишто работат со повисока компресија и во одреден работен режим ја палат смешата под дејство на компресија, како дизел. Браншата долго време експериментира со оваа идеја за „диз-ото“ (од дизел и ото), којшто работи тивко и врти брзо како бензинец, а постигнува штедливост и вртежен момент на дизел. Mazda прва ќе го примени овој принцип во сериско производство, и тоа токму во новата „тројка“.
Новата технологија троши за 30% помалку гориво и нема потреба од скапи филтри за честички гареж
Дволитарската верзија со механички компресор постигнува 190 КС и сé уште поседува свеќички за палење, коишто се активни при стартувањето на моторот и при високи вртежи. При делумно оптоварување, односно во секојдневни услови на возење, мошне „посната“ смеша се пали под дејство на компресија. Според Mazda, потрошувачката на гориво се смалува за 30% во споредба со бензинец со слична моќност. Уште поважно денес, драстично се смалува емисијата на честички гареж, поради што нема потреба од користење посебен филтер.
Логично е да се очекува дека Mazda повеќе нема да нуди дизел мотор во гамата на компактот, а потоа и во останатите модели од својата понуда. Во почетокот, класичен дизел ќе биде присутен во понудата, бидејќи купувачите уште не се подготвени да ги прифатат технолошките иновации од овој ранг. Истото важи и за класичните бензинци. Цената сепак претставува важен фактор.
[FAG id=31914]