Добавувачкиот гигант Magna потпиша договор за повеќе години да го снабдува BMW со менувачи со двојна спојка за модели со преден погон, вклучувајќи и верзија за 48-волтен благ хибриден погон. Менувачите ќе се произведуваат во Германија и во Словачка.
Групацијата BMW му го додели на добавувачот Magna најголемиот налог за менувачи во историјата на компанијата. Договорот е склучен на повеќе години и ги предвидува сите менувачи со двојна спојка за модели со преден погон, вклучувајќи и нивни верзии за модели со хибриден погон.
Разни верзии на менувачите на Magna ќе се вградуваат во повеќе од 170 моделски изведби и варијанти. Изведбата на менувачот на Magna за хибриден погон се одликува со тоа што не влијае врз габаритите на куќиштето на менувачот. Тоа е од голема важност при монтажата, затоа што не мора да се вршат дополнителни приспособувања на производствената линија.
https://photos.app.goo.gl/ZEeeZj7Zvwq4BL2W6
Хибридната варијанта користи 48-волтен електромотор со високи вртежи, којшто е вграден во самото куќиште на менувачот. Оваа погонска изведба постигнува пристојна заштеда во гориво при возење во град, но нуди поволности и во најразновидни услови и ситуации во возењето.
Менувачите ќе се произведуваат во фабриките на Magna во Ноенштајн, Германија и во Кечнец, Словачка.