Британците како да сакаат да се пошегуваат и на напливот од модели „Limited Edition“ го пуштаат својот Lotus Exige Cup 430 во нелимитирано издание. Пеформансите и возните својства на овој чистокрвен спортист се далеку од шега.
Моторот од Evora GT430 отсега работи и во Lotus Exige Cup 430, кадешто во полесна и помала средина постигнува вистински чуда во перформансите, дури и за стандардите за Lotus. Моделот пристига како наследник на Exige Cup 380, со моќност зголемена за 55 КС и воздушни струи кои притискаат со 220 килограми врз каросеријата. За споредба, Cup 430 при 160 km/h постигнува исто толку потисок како Exige Sport 350 при 270 km/h.
Соодносот меѓу моќноста и тежината е доведен на 407 КС на тон
Верно на марката, тежината е повторно смалена за 12 килограми, на 1.059 килограми – со опции се скусуваат уште три килограми. Со 3,5-литарски V6 со механички компресор, 436 КС при 7.000 вртежи и 440 Nm, најекстремниот Exige досега спринтува до сто за 3,3 секунди и продолжува до 290 km/h. Сопствената тест-патека во Хетел, болидот ја минува за 1:24,8 секунди. Тоа е за 1,2 секунда подобро од стандарден Lotus 3-Eleven.
„Овој автомобил нема ривали – во и надвор од неговата ценовна рамка – и не претеруваме кога кажуваме дека со овој Exige сме недостижни и на пат и на патека.“ Жан-Марк Гајлс, шефот на Lotus
Заштедата во тежината е постигната со рачно изработени компоненти од карбон: Преден сплитер, покрив, дифузор, странични прагови, заден капак и заден спојлер. Инженерите во Хетел работеа и на геометријата на подвозјето, а тука се и новите амортизери Nitron, со трикратно дотерување, во комбинација со приспособливи стабилизатори Eibach – како стандард.
Lotus Exige Cup 430 · Технички податоци
Мотор и пренос 3,5 литри V6, механички компресор Edelbrock со ладење, Моќност 436 КС при 7.000/min, вртежен момент 440 Nm при 4.000 – 6.800/min, 6-степен мануелен менувач со ладење, подмачкување со сув картер, издувен систем од титаниумска легура
Подвозје и каросерија Алуминиумска школка, напред и назад вентилирани сопирачки дискови 332 x 32 mm и 332 mm x 26, четириклипни сопирачки клешти AP Racing, по две триаголни водилки – напред челични, назад алуминиумски, приспособливи цевни стабилизатори Eibach, амортизери Nitron со трикратно дотерување (по 24 позиции за повратен од и нискобрзински работен од, 16 позиции за високобрзински работен од), пружини Nitron, контрола на стабилност (Drive / Sport / Race / Off), контрола на тракција со 6 степени (1%, 3%, 6%, 9%, 12% slip и off), контрола на притисок во гуми, лесен литиум-јонски акумулатор, бандажи од кован алуминиум со десет краци (17″ напред, 18″ назад), гуми Michelin Pilot Sport Cup 2 (215/45 R17, 285/30 R18)
Тежина Празно возило 1.093 kg (без течности 1.059 kg)
Перформанси, забрзување 0-100 km/h за 3,3 секунди, крајна брзина 290 km/h
Цени
- Велика Британија £99,800
- Германија €127,500
- Франција €128,600
- Италија €133,160