Toyota ќе ја искористи еуфоријата на Олимписките игри во 2020 година во Токио за претставување на цела серија модели посветени на манифестацијата, вклучувајќи модели со погон на водород.
Светскиот број еден Toyota е меѓу главните спонзори на Олимписките игри што ќе се одржат во Токио во 2020 година и својата инвестиција ќе ја искористи за свеста на јавноста за марката да ја подигне на уште повисоко ниво. Групацијата Toyota планира да претстави цела серија од модели посветени на Олимпијадата, вклучувајќи и голем број придружни настани.
Меѓу најзначајните премиери ќе биде верзијата со погон на водород од новата генерација на Lexus LS. Погонската спрега на луксузната лимузина ќе се потпира во најголемиот дел на технологијата што во моментов ја користи Toyota Mirai. Погон на водород ќе користи и верзија од Toyota Crown, која што не се нуди надвор од јапонскиот пазар. Водородната тројка ќе биде комплетирана со верзија од мултинаменската Estima, исто така позната само на домашниот пазар. Другите премиери на Игрите ќе бидат на фејслифтот на престижниот крстосувач Toyota Century, на новиот Prius, како и на неколку мултинаменски возила за домашниот пазар.