Други тестови

Jaguar и Land Rover во тура за културна преобразба низ Македонија (2)

Не е потребна научничка титула да се препознае дека Jaguar и Land Rover моментно испишуваат едно од најглавните поглавја во својата историја. Тоа станува уште појасно откако целата моделска гама ќе се испроба на дело.

Во септември по македонските патишта гостуваше дузина модели на Jaguar и Land Rover, во промоција на новиот увозник Аутомобили Груп и на трансформацијата што двете традиционални британски марки ја комплетираа, почнувајќи од почетокот на деценијава. Првиот дел од пробното возење го посветивме на Jaguar , продолжуваме со Land Rover.

Land Rover Above and Beyond 14

Најважниот во овој возен парк од „лесни оклопни возила“ е Discovery Sport. Тој не е ниту најскапиот, ниту најугледниот, ниту најнапредниот модел на Land Rover во моментов, но е важен поради тоа што од него започна да се отплеткува актуелното поглавје на марката, откако првиот чекор беше направен со Range Rover Evoque. Наследникот на Freelander беше претставен премиерно во септември 2014 година, најавен од Land Rover како најспособен и најпрактичен модел во сегментот.

Land Rover Discovery Sport го продолжи залетот што го даде Evoque

Британските специјалисти решија да се ослободат од имиџот на Freelander, когошто го следеше глас на ненадежен автомобил уште од времето кога сопственик беше Rover. Од овој негативен имиџ, којшто само малку се поправи по преоѓањето под сопственост на Ford, денес не останало ништо. Не само тоа, туку повеќето од конкурентите остануваат во длабока сенка покрај начинот на когошто Land Rover ја спојува традицијата со најнапредната технологија.

Land Rover Above and Beyond 3

Платформата е заедничка со „конкурентскиот“ Jaguar Е-Pace и Range Rover Evoque, со масовна примена на алуминиум и интелигентна конструкција на задната оска што овозможува рационално искористување на просторот. Иако со димензиите не отстапува премногу од конкурентските модели, Discovery Sport сепак располага со доволно простор за три реда седишта. Теренските способности се неоспорни, а ако е потребна потврда и со бројки: Disco Sport може да понира во вода до длабочина од 60 сантиметри.

Преоѓањето на алуминиум и самоносечка каросерија симна половина тон од Land Rover Discovery

Во минатата пролет следеше и вистинскиот Discovery, развиен и претставен пред светот според основното начело дека единствено Land Rover може да биде подобар од Land Rover. Алуминиумот и преоѓањето на самоносечка каросерија му одзедоа 480 килограми од тежината во споредба со претходникот, но тоа не му одзеде ништо од способноста за влечење. Три цели тони и уште половина тон смее да се закачат на влечната кука на овој петметарски крстосувач.

Land Rover Above and Beyond 9

По 27 години опстојување на моделското име и над 1,2 милион продадени примероци, веројатно не е останато место на планетава каде што Discovery не згазнал. Во возењето е тешко да се забележи дека станува збор за автомобил за кого што е потребно половина час додека се обиколи, Discovery е кроток и спокоен. Можеби токму оваа смиреност во возењето е причината што пред пробното возење на целата моделска гама требаше да се минат теренските предизвици симулирани преку вратоломни рампи на покривот на салонот на Jaguar и Land Rover.

Понирање во вода длабока до 900 милиметри

Само неколку од бројките во личната документација на Disco: Автоматско спуштање за 40 милиметри заради полесен пристап, 900 милиметри длабочина на понирање во вода, 6 приклучоци за 12 волти, до 8 корисници на мрежа и 4 таблети, 9 УСБ-приклучоци, бензинец 3.0 V6 со механички компресор и 340 КС и шестцилиндарски дизел со 258 КС во пробниот модел, кој работи небаре е електромотор. Знак на распознавање, покривот на две нивоа, по пример на претходникот.

Land Rover Above and Beyond 5

Колку Land Rover обожува да си игра со своите нови модели најдобро покажува ангажирањето на белосветскиот авантурист Бер Грилс, кој во групен скок со падобран ги намести седиштата во Discovery користејќи мобилна апликација. Не е далеку времето кога специјалист за терен и „бритишнес“ ќе ја реализира технологијата што преку примена на камери ќе направи хаубата да исчезне од видното поле, отворајќи му на возачот чисто видно поле.

Velar е како концептен автомобил да побегнал од премиера на салонски штанд

Кога се чинеше дека барем неколку месеци светот ќе здивне од спектакл-мајсторот, следеше уште една сензација. Velar, именуван според првата серија прототипи пред Range Rover да се појави на свет. Како дизајнот на каросеријата да е недоволен, па во тест-возилото пречекуваше и ентериер во бело, вклучувајќи го и воланот. Купе-теренецот изработен врз платформата на Jaguar F-Pace изгледа како концептен автомобил побегнат од премиера на салонски штанд, вклучувајќи и детали како сокриени рачки на вратите. Благородничкиот и надмен стил на Velar во иднина ќе созрева и за поголемите модели на „ролс-ројсот“ меѓу теренците.

Land Rover Above and Beyond 7

А, што е со овој шминкерски портокалов кабриолет на база на Range Rover Evoque? Тој може да се разбере или како историски најверно отелотворување на британскиот хумор во автомобил или како понижувачки чин за закоравените производители на автомобили од континентот, на коишто и смената на маската им е доволна да прогласат нова моделска генерација. Доволно е што барем уште неколку години Evoque Convertible ќе остане единствен веродостоен спој на кабриолет и теренец. Меѓу другото, првиот Land Rover беше теренец кабриолет.

 

Ознаки
loading...

Слични објави

Напишете коментар

Вашата адреса за е-пошта нема да биде објавена. Задолжителните полиња се означени со *

Откриен е Adblock

Ќе ни помогнете доколку ја исклучите вашиата блокада за реклами