Папата Францис доби уникатен примерок на Huracan како подарок од Lamborghini. Суперспортскиот автомобил во боите на ватиканското знаме и со потпис на католичкиот поглавар ќе се понуди на наддавање, средствата од продажбата ќе бидат префрлени во проекти во Ирак и Африка.
Lamborghini изработи уникатен примерок од Huracan RWD за Ватикан. Папата Францис денес и официјално го благослови скапоцениот автомобил, ставајќи го својот потпис на каросеријата во бела и златна боја. Наддавањето во организација на Сотби е закажано за 12-ти мај 2018 година, средствата од продажбата ќе бидат пренасочени во три проекти.
Првиот проект е реконструкција на Ниневиската Рамнина во Ирак, што има за цел да овозможи враќање на христијанската заедница во овој историски важен регион, преку обновување на нивните домови, јавни установи и верски објекти. Дел од средствата ќе добијат и Заедницата на Папата Јован 23-ти, којашто им помага на жените жртви на трговија со бело робје, како и две италијански здруженија коишто им помагаат на злоставувани жени и деца во Африка.
Двајца врвни мајстори на Lamborghini Ad Personam работеа на уникатот за Ватикан
Lamborghini Huracan RWD е изработен во одделот за специјални нарачки Ad Personam на спортската марка од Сант Агата. Белата боја на каросеријата и деталите во тибериско-жолта боја го симболизираат знамето на Ватикан.