Новиот спортски теренец на Skoda ќе биде претставен во втората половина од годинава и ќе носи име според видот мечки кои живеат на далечен остров во Аљаска.
Чешката марка на Volkswagen денес потврди и официјално дека името на новиот спортски теренец ќе гласи Kodiaq. Серискиот модел што произлезе од студијата VisionS од салонот во Женева го носи името според мечките од видот „кодиак“ кои живеат на далечен остров покрај јужниот брег на Аљаска. Зборот потекнува од јазикот на староседелскиот алутејски народ. Skoda премиерно ќе го претстави моделот пред јавноста во втората половина од годинава.
#KODIAQ! První SUV mladoboleslavské automobilky ponese název podle medvěda žijícího na ostrově poblíž Aljašky! https://t.co/eiRvjKDRbT
— skoda.cz (@skodacz) May 6, 2016
Впечатлив е соодносот на населението на островот Кодијак. Покрај 14-те илјади човечко население, на овој фасцинантен остров живеат близу 3.500 мечки од видот кодиак. Локалниот народ ја нарекува мечката „так укаак“. Вообичаено е имињата на животинските видови на алутејскиот јазик да завршуваат на латинското „Q“, па оттаму и Skoda избра името на новиот теренец да завршува со Q, наспроти претходните шпекулации според кои името требаше да гласи Kodiak.
Големиот теренец ги задржа димензиите од студијата VisionS од Женева, што значи дека должината на каросеријата изнесува 4,70 метри. Тоа е доволно простор да се додаде трет ред седишта и возилото да се понуди во верзија на седумсед. Доколку се користат пет седишта, останува џиновски простор за товар.
Како што посочува Skoda, моќта на Kodiaq се огледува во дизајнот, кој поседува „препознатлива, мускулеста линија, што оддава динамична, робусна и моќна појава.“ Слоганот под којшто Skoda ќе го промовира новиот теренец гласи „Discover new ground“. Со овој модел позициониран над актуелниот Yeti и изведен на заедничка платформа со Volkswagen Tiguan и Seat Ateca, чешката марка го одбележува стартот на моделската офанзива во сегментот на спортските теренци. Продажбата на Kodiaq ќе започне рано во текот на следната година.