Дарко Јаконов
Kia Sportage е првиот автомобил што го мина супертестот на 100.000 километри на магазинот Auto, Motor und Sport без ниту еден дефект. Истиот резултат сега го потврдува и Auto Bild.
Ниту еден автомобил не успеа да ги извози стоте илјади километри на супертестот на германскиот Auto, Motor und Sport без ниту еден дефект или забелешка на експертите – до јуни. Тоа за првпат му успеа на компактниот спортски теренец на Kia. Солидноста на Sportage од третата генерација сега се потврди и на супертестот на магазинот Auto Bild, исто така на 100.000 километри. Со тоа, Kia Sportage без проблеми ја освои највисоката оцена и се најде на првото место на ранг листата на 33 модели што досега го минале беспоштедниот супертест. За триумфот да биде уште поубедлив, Sportage имаше најниска стапка на дефекти од сите 68 тестирани модели во студијата што институтот J.D. Power ја спроведе меѓу сопствениците на возила.
https://twitter.com/autobild/status/766193456163147776
Освен за издржливоста, Auto Bild искажува пофалби и за техничката состојба при завршното тестирање и за впечатоците во секојдневната практика. Возилото на тестот беше Kia Sportage од третата генерација, со дволитарски дизел со 184 КС, автоматски менувач и погон на сите тркала. Во меѓувреме на пазарот стартуваше со продажба четвртата генерација на моделот.
