Дарко Јаконов
Вановите се уште една вид автомобили што исчезнаа во СУВ-бранот. Kia очигледно сака да ги одржи во живот „загрозените“ видови и го најавува Carnival, моделско име што долги години е присутно на сцената на семејните ванови. Дизајнот, секако, прв го привлекува вниманието.
Менаџерите на Kia очигледно сакаат предизвици. Омилени им се каросериските форми и сегментите што повеќето марки веќе одамна ги имаат нашутено. Корејскиот производител со длабоки корени во Европа и во САД, како еден од последните предизвици да ги зачува „загрозените“ видови, се впушти во стилските и престижни комби изведби во компакт класата – го создаде ProCeed и нормално доби еден од моделите со најголем раст на пазарот.
Овојпат предизвикот е уште потежок, затоа што спојот меѓу вановите и СУВ-возилата е уште поблизок. Kia ја претстави четвртата генерација на својот семеен ван Carnival. Тој е семеен ван, но е во исто време и „Grand Utility Vehicle“, односно големо повеќенаменско возило. Асоцијацијата на Sport Utility Vehicle секако не е случајна. Kia цели со најголемиот ван во својата понуда кон прогресивните млади семејства и нуди спој на иновација, приспособливост и стил.
Дизајнерскиот говор на Kia е применлив универзално, успева исто и кај ProCeed и кај Telluride – или сега кај Carnival
Дизајнот оддава впечаток на солидно и цврсто изграден автомобил, Carnival буквално изгледа како куќа на тркала. Тоа влева чувство на згриженост на безбедно. Во исто време се присутни сите дизајнерски белези што ги носат останатите модели од новите генерации, меѓу кои Sorento, Telluride или Optima и Ceed. Стилот е тоа што Kia цени дека ќе ги привлече купувачите, за повторно да ги препознаат предностите на концептот на ван.
Носот е издаден малку, предните столбови се поместени наназад, со цел да се добие долга хауба. Меѓуоскиното растојание е зголемено во споредба со претходничката и секако ветува повеќе простор внатре. Хаубата дава нови пропорции на ванот на Kia, наспроти претходните генерации ванови кои генерално изгледаа како клин со тап врв.
https://photos.app.goo.gl/HHH51R8qQB43ErY56
Предните и средните столбови се бојадисани црно, со цел да се нагласи елеганцијата на линијата на покривот. Задните столбови го применуваат стилот што претходно го видовме кај новиот Sorento. Формата на хромираната перка се повторува и во кабината.
Носот прикажуива ново толкување на стилот на „тигарски нос“ по целата ширина на предниот дел од возилото. Има и футуристичка нота, овој автомобил ќе привлекува внимание и во салон и на улица. Препознатливоста навечер ја гарантираат светлата со посебна шема.
Kia не открива технички детали заедно со објавувањето на првите официјални фотографии на новиот ван, но наскоро треба да следат и тие. Продажбата стартува во Кореја веќе летово, а потоа ќе следат и бројните пазари ширум светот.
