Дарко Јаконов
Во возниот парк на Општина Карпош пристигнаа неколку наменски возила за одржување на улиците и за собирање отпад. Целата постапка околу набавката и изборот мина незабележано во медиумскиот простор – затоа што сé е правилно.
Вестите обично не се двојат на добри и лоши, затоа што според вечното правило, лошите вести секогаш се шират побрзо и се добри за споделување. Затоа и вестите што досега се објавувале при набавките на возила и обновувањето на возниот парк во јавниот сектор секогаш биле поврзувани со одредени неправилности, па по некоја логика на инерција би можело да се заклучи дека секоја набавка е лоша. Но, не морало да биде.
На службеното паркиралиште на Општина Карпош се појавија неколку нови возила што имаат специјална намена со цел на одржување на јавната хигиена. Како што ни соопштуваат од Општината, станува збор за две цистерни за миење на сервисните улици, еден лесен камион со отворена товарна платформа за подигнување отпад, рачен вшмукувач за лисја и џебен отпад, како и опрема за расчистување снег и мраз, којашто се состои од плуг и распрскувач на сол.
Возилата и пратечката опрема се набавени со користење на грантот за успешност од Светска банка во висина од 75.000 евра, кој беше добиен лани во август, откако Општината успешно обнови повеќе улици и ја прошири атмосферската канализација. Овие грантови, пак, се дел од проектот за подобрување на општинските услуги на Министерството за финансии.
Користењето на овие возила во одржувањето на чистотата на улиците што се под надлежност на Општина Карпош дополнително ќе придонесе и за намалување на загаденоста на воздухот, како проблем што масовно е присутен во повеќето населени места во државата. Како што укажуваат светските студии и искуства, освен со штетните материи во издувите гасови од возилата, сообраќајот дополнително придонесува за загаденоста на воздухот и со честичките што се ослободуваат при абењето на гумите на возилата со асфалтот, како и со честичките при триењето во сопирачките на возилата.
Избрани возила што реално одговараат за ниво на работа во општински рамки, место за расчистување снег на Стража
Од тоа што ние можеме да го оцениме во поглед на изборот на возилата, кои потекнуваат од кинески производител, предностите се во ниските оперативни трошоци, затоа што станува збор за лесни товарни возила, соодветни за обемот на работа на територија на општина, а воедно и за техника што е робусна и едноставна за одржување и сервисирање. Тоа, пак, понатаму ќе влијае за возилата да бидат во редовна употреба и ќе придонесе за реално да се постигне поголема чистота на улиците – вклучувајќи го и аспектот на намалениот удел од штетни честички кои се разлетуваат во воздухот при движењето на возилата.
Во изјавата што ја добивме за зголемувањето на возниот парк на Општина Карпош, градоначалникот Стефан Богоев посочува: „Мило ми е што го зголемуваме возниот парк со механизација за поддршка на нашите комунални служби, за миење на улиците и полесно подигнување на отпад. Нема набавка на луксузни возила, туку фокусирани сме да ја подигнеме јавната хигиена и да го намалиме еден од најгорливите проблеми – аерозагадувањето. Старите карпошани, скопјани ја паметат сликата на миење на улиците со цистерни и ова повторно ќе биде наша реалност“.
Минатата година, Општината набави и две машини за перење под висок притисок (т.н. вапови) кои комуналните служби ги користат за чистење на јавни површини, плоштади и платоа.
Со градоначалникот Стефан Богоев околу новите сообраќајни решенија во Карпош
