Дарко Јаконов
По шестмесечно глобално гласање, Jaguar E-Type е избран за најдобар британски автомобил во историјата, во конкуренција на Mini Cooper S, McLaren F1, Bentley Speed Six и Lotus Seven.
Чекањето конечно заврши и прашањето на секој автомобилски ентузијаст доби одговор: Најдобриот британски автомобил на сите времиња е Jaguar E-Type. Светското гласање за десетте избрани британски икони во финалето траеше шест месеци. Организатор беше Classic & Sports Car, најтиражниот магазин за олдтајмери во светот, а резултатот беше објавен пред почетокот на традиционалниот „уличен“ саем на автомобили во Лондон, на посебна манифестација во Александра Палас.
Почесниот гостин Ант Анстед, кој е дел од тимот на „Building Cars Live“ на BBC, го симна превезот од најстариот примерок на E-Type, односно точно автомобилот кој Норман Дејвис го возеше од Ковентри на неговата светска премиера на салонот во Женева во март 1961 година. Долгогодишниот сопственик на легендарниот „77 RW“, Мајкл Килгенон, во 2000-та година трајно го отстапи автомобилот на музејот на Jaguar Daimler, за истиот подоцна да биде целосно реставриран.
Десет икони на британската автоиндустрија беа избрани за финалното гласање
Гласањето го иницираше магазинот Classic & Sports Car, откако над 100 автомобилски експерти ги избраа десетте историски автомобили за финалето. Ова се десетте избрани автомобили: Austin Seven, McLaren F1, Range Rover, Lotus Seven, Jaguar XKSS, Rolls-Royce Silver Ghost, Ford GT40, Mini Cooper S, Bentley Speed Six и Jaguar E-type.
Секако дека култниот модел на марката со дивата мачка уште од почетокот беше меѓу фаворитите. Тој не само што беше ценет како најбрз и најубав автомобил во своето време, туку и чинеше двојно помалку од моделите што ги оставаше зад себе. Jaguar произведе сензационални 75.000 примероци од автомобилот што ќе остане трајно запишан во историјата.
