Дарко Јаконов
Одделението за „специјални операции“ на групацијата Jaguar Land Rover за првпат работеше на модел од спортската марка, да го направи најбрзиот F-Type кој сериозно му се заканува на Porsche 911 Turbo.
По Range Rover Sport SVR како најбрз и најсилен модел во историјата на теренскиот специјалист, специјалното одделение на групацијата Jaguar Land Rover сега и се посвети и на својата спортска марка, за Jaguar F-Type да го „унапреди“ соодветно во најбрз и најсилен модел под знакот на дивата мачка.
F-Type SVR е посилен, полесен, со подобрено подвозје, активна аеродинамика и модифициран погон на сите тркала, за сето тоа во комбинација со лесната алуминиумска конструкција на стандардниот модел да понуди максимални перформанси и уживање за возачот. Во бројки: Петлитарскиот V8 со механички компресор од F-Type R е калибриран според примерот од F-Type Project 7 и располага со 575 КС и 700 њутнметри, забрзувањето до 60 mph (96 km/h) трае 3,5 секунди, крајната брзина на купето е 320 km/h, а на кабриолетот 314 km/h.
Поголемите отвори за воздух во предниот браник, заедно со модифицираните интеркулери и отвори во хаубата се грижат за подобрено ладење и поголема ефикасност на моторот. Издувниот систем е изработен од легура на титаниум и инконел, издржува повисоки температури и притисоци и полесен е за 16 килограми во споредба со F-Type R, со дебелина преполовена на само 0,6 милиметар. Секако дека специјалистите на JLR се погрижија и звукот соодветно да ја „репродуцира“ моќта на машината, особено кога се отворени активните придушници во задните издувни лонци.
Промени претрпе и осумстепениот менувач со двојна спојка, заедно со оптимизација на погонот на сите тркала и вградување за 10 милиметри пошироки гуми, 265 напред и 305 назад. Целото возило е за 25 килограми полесно од F-Type R, односно за 50 килограми со опцијата за карбон-керамички сопирачки и карбонски покрив, што во комбинација со оптимизираната аеродинамика ги качува возните својства на уште повисоко ниво.
Подвозјето секако дека не остана поштедено. Задниот стабилизатор е подебел, вентилите во приспособливите амортизери се модифицирани, исто како и контролниот софтвер. Зглобовите на задната оска се скрутени, заради уште посуверено задржување на геометријата на подвозјето во екстремни услови и уште подиректно чувство на воланот. Предниот стабилизатор е потенок, што заедно со новиот софтвер дозволува уште попрецизна контрола на сопирањето на тркалата од внатрешната страна на свијоците заради намалување на подуправувањето.
Премиерата на SVR е закажана за претстојниот салон во Женева во март, Jaguar веќе стартува со нарачки, цената е 140.000 евра. Тоа е веројатно и една од најголемите закани за конкуренцијата.
