Нов дизајн, нова технологија и нова изведба Sport ќе му дадат сила на компактот на Honda против конкуренцијата во втората половина од моделскиот век.
Civic и комби изведбата Civic Tourer добија освежен изглед на предниот дел, со нови светла со интегрирани дневни светла и редизајниран браник. Кај комбилимузината е нов и задниот браник, праговите, задниот спојлер во црна боја, како и задните светла, отсега со диодна техника. Во чекор со освежувањето на надворешноста се извршија и неколку промени во кабината. Седиштата имаат нови облоги и лого на потпирачите за глава, нови се облогите во вратите со хромирани рачки за отворање, а командната табла е обложена со панел во црна металик боја.
Во новото моделско годиште на Civic следува и премиера на мултимедискиот систем Honda Connect, којшто како што кажува и името овозможува пристап на интернет и интернет радио, дополнително на приемот на дигитално радио, блутут поврзување, сателитска навигација и приказ од камерата за рикверц. Системот користи Android 4.0.4 и преку дисплејот од седум инчи овозможува ракување со истите потези како кај паметен телефон.
Новитет во моделската понуда е Civic Sport, како наследник на Type S од претходната генерација, со 1,6-литарски дизел од 120 КС или 1,8-литарски бензинец со 142 КС од стандардниот Civic, но со лакиран заден спојлер и бандажи од 17 инчи ексклузивно за Civic Sport. Моделот позајмува и неколку детали од идниот Type R, како предниот браник со решеткаста структура во долната маска и црн таван во кабината.
Стандард во новото моделско годиште е системот CTBA (City Brake Active), чијашто функција е да ги спречи судирите при брзини до 30 km/h, со користење на радарска технологија за скенирање на патот пред возилото и автоматско активирање на сопирачките кога електрониката ќе утврди дека постои опасност од судир. Премиерата е на втори октомври на салонот во Париз.