Автомобилската сцена е во задоцнета лего-манија. По Bugatti, McLaren и слични, дојде ред и еден „народски“ брз автомобил да добие изведба што не се поместува. Honda Civic Type R во изведба од лего коцки е плод од макотрпна работа: 1.300 часови, 320.000 коцки, деветчлен тим.
Honda ги ангажираше професионалците на Lego да изработат примерок од Civic Type R во природна големина – од преку 320.000 коцки од данскиот специјалист што го занимава целиот свет и сите возрасти. Овој своевиден подвиг е направен со цел коцкастиот Type R да се појави на шоуто Lego Masters, кое ќе се пренесува на австралискиот „Channel Nine“.
Изработката траеше вкупно 1.300 часови, а учествуваа девет членови, рачно составувајќи коцка по коцка. Во детали е одено дотаму што светлата и трепкачите работат, па дури има и верно лого на Honda, на маската и на задниот капак, како и на бандажите.
Покрај тежината на коцките од преку 1 тон е нормално дека основата за структурата сепак ја сочинува челична рамка
Основата за коцките ја сочинува челична рамка. Коцките се залепени и во целост потекнуваат од стандардната понуда на Lego. Преку таблет се вклучуваат предните светла, магленките и стоп-светлата.
Осум тимови од хоби-ентузијасти со Lego ќе учествуваат на „мастерсот“, паралелно составувајќи сложени структури од коцки. Lego Civic Type R ќе се појавува на посебни настани ширум Австралија во следните неколку месеци.