Јапонската марка планира уште пред завршетокот на деценијата да започне со продажба на електричен спортски автомобил со моќност од најмалку 350 КС. Honda најавува и досег од над 400 километри.
Honda работи на електричен спортски автомобил, со моќност од најмалку 350 КС и досег од над 400 километри, којшто треба да стартува со продажба неколку години пред завршетокот на деценијата. Тоа денес го најави јапонскиот производител, во предвечерието на салонот во Токио. Јапонците уште не го откриваат сегментот во кој ќе припаѓа возилото и цената на истото.
Техниката моментно се испробува во прототипи на база на компактното купе CR-Z, кое досега се нудеше исклучиво со хибриден погон. Како пример за инженерите послужи тркачкиот автомобил кој исто така е изведен од CR-Z и со 450 КС е значително посилен од идниот сериски модел, но и покрај тоа, Honda ветува слични перформанси. Забрзувањето до 100 km/h ќе трае околу 3,5 секунди, а крајната брзина ќе биде ограничена на далеку над 200 km/h.
Истото важи и за неконвенционалната погонска техника на спортскиот автомобил, којашто има за цел да го зголеми уживањето во возењето. Секое тркало ќе поседува електромотор и секој од четирите електромотори ќе биде контролиран посебно, што ќе овозможи моќта да се пренесува на начин што обезбедува врвна стабилност во свијоците.