Тоа би требало да е лоша вест, но ако се има предвид дека целата индустрија во земјата (и не само таму) мируваше цел април, пак е куриозитет тоа што автонацијата произведе околу 11.000 возила.
Бројките за продукцијата на автомобили во април требаше да останат на „нула“, откако повеќе земји производители на автомобили ги запреа лентите. Со испораките беше поинаку, затоа што дистрибуцијата во основа продолжи до дилерите и до регионалните центри, но секако дека и таму имаше масивен пад.
Како своевиден куриозитет во овие времиња што сакаме брзо да ги надминеме, во Германија во минатиот месец пак биле произведени околу 10.900 автомобили. Тоа е пад од 97 проценти. По првите четири месеци од годинава, тамошната продукција одвај достигна еден милион возила (-38 проценти).
Нарачките за производство од домашната мрежа се намалиле за 70% поради корона-кризата, односно за 32 проценти од почетокот на годината. Од странската мрежа во април пристигнале 47% помалку нарачки за производство (-25% до април).
Извозот речиси целосно запрел. До клиентите ширум светот биле испорачани само 17.600 свежо произведени патнички автомобили (-94%). Од почетокот на годинава, бројката изнесува 794.700 возила или за 38 проценти помалку од истиот период лани.