Германските власти отпочнаа постапка за воведување на планираното зголемување на годишниот данок, за возила што имаат висока потрошувачка на гориво.
Од следната година во Германија ќе се наплаќа повисок годишен данок за новорегистрираните возила што имаат висока потрошувачка на гориво. Владиниот кабинет во Берлин ја започна процедурата за донесување законски измени, со цел да се подобри заштитата на климата и воедно граѓаните да се поттикнат да избираат поштедливи автомобили. Мерката нема да ги погодува автомобилите што веќе се регистрирани во земјата.
Висината на данокот ќе се промени незначително за автомобилите од класите на Polo и Golf. Дополнителната компонента во данокот којашто се однесува на заштитата на климата ќе се пресметува доколку возилото има емисија на СО2 над 96 грами на километар. Оваа компонента ќе се зголеми значително во случај автомобилот да има емисија на СО2 над 116 g/km. Данокот ќе се зголеми првенствено за големите и тешките СУВ-модели, како и за спортските автомобили. Следна инстуција што треба да се изјасни за мерката е бундестагот.
Промените се дел од пакетот за заштита на климата, за што се залага такаренечата црно-црвена коалиција во земјата. Критиките за мерките се движат во две крајности. Едната страна цени дека климатската компонента треба да биде уште повисока, додека другата страна искажува загриженост дека реформата ќе ѝ наштети на автомобилската бранша, којашто заработува добро од продажбата на СУВ-возила.
Повеќе околу овие измени од најголемиот пазар на континентот, кој влијае и генерално на европскиот пазар, во нашата претходна објава на темата:
Германија ќе го зголемува данокот на автомобили од 2021