Дарко Јаконов
Вработените во General Motors постигнаа спогодба со управата, но уште не се враќаат на своите работни места. Сега е ред членовите на синдикатот да ја разгледаат и евентуално да ја одобрат спогодбата, а тоа може да потрае.
Вработените во најголемиот автомобилски концерн во САД, General Motors, уште продолжуваат со штрајкот и покрај првично постигнатиот договор околу тарифите. Од синтикатот соопштија дека прекинот во работењето може да трае подолго време, односно додека сите членови го одобрат договорот. Усогласувањето на ставовите ќе продолжи и во периодот до 25-ти октомври, поради што штрајкот ќе се продолжи за најмалку една седмица.
Синдикатот на работниците во автомобилската индустрија постигнаа првична спогодба околу донесувањето на нов договор за пресметување на работната тарифа, којшто ќе важи во следните четири години, но е неопходно да се согласат и членовите на синдикатот. Вработените во американскиот концерн ја прекинаа работата на 16-ти септември, откако пропаднаа преговорите околу новата работна тарифа.
Прв штајк во General Motors по дванаесет години
Вработените бараат меѓу другото да се воведе поприфатлива основа за надомест за работниот труд, како и подостапно здравствено осигурување. Работниците дополнително се борат и за соодветно учество во постигнатиот профит и за сигурно вработување.
Ова е првпат по дванаесет години да се штрајкува во General Motors. Според процените на пазарните аналитичари, прекинот во работењето досега го чини американскиот производител повеќе од две милијарди долари.
