Дарко Јаконов
Пикапот на Ford се покажа како вистински погодок на 20-те најголеми пазари во Европа, каде што Ranger до ноември се продаде во над 25.000 примероци. Штотуку почнува големата битка во овој сегмент.
Ford Ranger е најпродаван пикап на 20-те најголеми пазари во Европа во периодот од јануари до ноември годинава, со раст во продажбата од 32 проценти и вкупно 25.500 примероци. Тоа е вистинско изненадување во пазарниот сегмент кадешто досега доминираа пикапите од јапонските марки, првенствено Toyota Hilux, Nissan Navara и Mitsubishi L200.
Неизвесно е дали американскиот модел ќе ја задржи предноста и во претстојниот период, кога претстои пазарно воведување на новите генерации на тројката јапонски пикапи, но и на новата генерација на Ford Ranger. Актуелниот модел стартуваше со продажба во Европа на крајот на 2011 година и го удвои пазарниот удел од 11,7 проценти во 2012 година на 23,5 проценти во првите десет месеци од годинава.
Во периодов следува и лансирање на новата генерација на Ranger, со нов дизајн, напредна технологија и подобрена ефикасност на моторите. Во верзијата со двојна кабина, новиот Ranger е единствениот пикап што има добиено пет ѕвездички на краш-тестот на Euro NCAP според нормите од 2012 година.
Нарачките за новиот модел ги надминуваат очекувањата на производителот, а особено за топ-моделот Wildtrak, со впечатливи каросериски детали и облагороден изглед во ентериерот. Ford нуди и низа безбедносни системи во новиот Ranger, вклучувајќи систем за следење лента, радарски темпомат со предупредување при опасност од судир, препознавање сообраќајни знаци, камера за рикверц и контрола на стабилност со систем против занесување на приколката.
Со воведувањето на систем старт-стоп, можност за избор на подолг краен преносен однос и електрично сервоуправување, потрошувачката на гориво во новата генерација на Ford Ranger е намалена за 17 проценти во споредба со претходникот.
