170
22 shares, 170 points

Ford разви посебна изведба на суперспортскиот GT, којашто ги прескокнува ограничувањата во правилниците за мотоспорт и има за цел да ја прикаже полната моќ на овој култен автомобил со вредна историја. Резултатот се 700 КС, четирипати поголем потисок и гаранција за 2g во свијоци. Серијата ќе се изработи во само 45 примероци.

Ford и специјалистот Multimatic го искористија Фестивалот на брзината во Гудвуд да претстават посебна изведба на суперспортскиот GT, со дополнителна ознака Mk II. Целта беше да се конструира изведба на GT, којашто ќе го прикаже целосниот потенцијал на автомобилот, но надвор од ограничувањата во мотоспортот. Во развојот, сепак влијаеа искуствата стекнати со Ford GT во многубројните тркачки серии.

Mk II ќе се изработи во само 45 примероци, со почетна цена од 1,2 милион долари

Екстремната изведба ќе се изработува во Онтарио/Канада, односно во истите погони од кадешто излегува и стандардниот Ford GT. Готовите примероци потоа ќе заминуваат во посебната фабрика на Multimatic Motosports, кадешто ќе се вршат соодетните преправки во „Mk II“.

New photo by Automedia MK / Google Photos

Главното внимание е поставено на моторот и на аеродинамиката. Големиот заден спојлер, на пример, многу е поголем отколку што дозволуваат правилниците во мотоспортот. Преработени се предниот сплитер, дифузорот, крилата и отворите за воздух. Со овие промени, Ford GT Mk II постигнува околу 400% поголем потисок од стандардниот GT. Посебни зафати во подвозјето и тркачки гуми Michelin Pilot Sport GT овозможуваат вредности на страничното забрзување и над 2g.

Заштедени се повеќе од 90 килограми со отстранувањето на висинското дотерување на каросеријата и на системот за избор на режими за возење

Прескокнувајќи ги лимитите во правилниците, 3,5-литарскиот V6 EcoBoost во Ford GT постигнува 700 КС, односно 200 коњски сили повеќе од „легалната“ тркачка верзија на автомобилот. Седумстепениот менувач со двојна спојка доби нова калибрација.

New photo by Automedia MK / Google Photos

Моќноста на моторот е постигната со нова технологија на ладење, заедно со поголем интеркулер, со ладење преку прскање вода. Ова прскање се вклучува автоматски при висока надворешна температура, за да се гарантира иста моќност и при висока жега.

Промените во кабината се сведуваат на седиште Sparco со тркачки ремен со 6 точки и дисплеј за телеметрискиот систем, кој воедно служи и за прикажување на сликата од камерата за рикверц.

 


Ти се допаѓа? Сподели со пријателите!

170
22 shares, 170 points
Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

0 Comments

Вашата адреса за е-пошта нема да биде објавена. Задолжителните полиња се означени со *