Половина од анкетираните возачи мрзат да го слушаат класичарот меѓу божикните песни Last Christmas од Wham. Ниту останатите божикни песни што го сочинуваат стандардниот репертоар на радијата во ова време не заостануваат на списокот.
Почната е сезоната на божикни песни кои се дел од машинеријата за масовно купување подароци во пресрет на католичкиот Божик. За неколку денови почнуваат и долгите застои и чекања во колона по улиците. Компанијата Ford го искористи овој период кога народот минува долго време во автомобилот, да спроведе анкета и да ги праша германските возачи, како тие реагираат на божикните песни на радиото.
Резултатот: На првото место на најомразени песни, неприкосновено и без двоумење, се наоѓа Last Christmas од Wham. Со мал заостаток следат Feliz Navidad и All I want for Christmas. Секако дека постои и круг на обожаватели кои активно се внесуваат во овие песни.
Петмина не ја поднесуваат, четворица ја обожуваат
Повеќе од половината испитаници не можат да ја поднесат Last Christmas. Но, голем дел од останатата публика ја обожува песната, конкретно 38 проценти. На листата на најомразени песни следат Feliz Navidad од Хозе Фелисијано и All I want for Christmas од Мараја Кери, со по 36 проценти. Еден од секои четири испитаници ги покрива ушите и на песни како Do they know it’s Christmas (Band Aid), White Christmas (Бинг Крозби) или Driving home for Christmas (Крис Риа). Подеднакво е голем и кругот на обожаватели, што значи дека без разлика која е песната на радио, еден од четирите патници во возилото сигурно ќе пее.
Во анкетата спроведена во почетокот на декември учествувале над 1.500 испитаници на возраст меѓу 18 и 75 години.