Спортското одделение на Renault одбележува 40-годишнина и враќање во формула 1 со специјална верзија на Clio R.S. Моторот со 275 КС потекнува од Megane RS.
Во рамките на трката за големата награда на Монако, Renault претстави специјална верзија на Clio R.S., со најсилниот мотор со кој моментно располага француската марка и со каросерија во боите на тркачкиот болид во формула 1. Renault на овој начин ја одбележува четириесетгодишнината на своето спортско одделение, а воедно и враќањето во кралицата на мотоспортот. Аналогно на тоа, јубилејниот Clio ја носи ознаката R.S. 16, според болидот.
Автомобилот што засега останува уникат се појави на патеката во Монако со Кевин Магнусен зад воланот. Французите не случајно го избраа Монако за претставување на Clio R.S. 16, сакајќи на тој начин да укажат на врската меѓу спортските автомобили на Renault Sport за обичните улици и тркачките болиди.
Дволитарецот во Clio R.S. 16 потекнува од Megane R.S. 275 Trophy-R и со 275 КС и 360 њутнметри е најсилниот мотор што се вградува во Renault. Тимот на Renault Sport успеа за пет месеци да го смести моторот, менувачот и системот за ладење од Trophy во Clio. Заедно со тоа следуваа и измени во издувниот систем и секако во подвозјето. За звукот соодветно да ја нагласи моќноста на укинатниот Clio се погрижи специјалистот Akrapovic.
Ширината на каросеријата е зголемена за 60 милиметри, колку што веројатно е зголемена и ширината на трагата на оските. Под крилата вртат тркала од 19 инчи. Како завршен потег следуваат диодни дневни светла во стилот на Renault Sport Vision. Традиционалната сириус-жолта боја на Renault Sport е комбинирана со ретровизори и други детали во сјајно црна боја, по пример на тркачкиот болид на Renault Sport во формула 1.
По премиерата во Монако, следното појавување на Clio R.S. 16 е најавено на Фестивалот на брзината во Гудвуд, на 23-ти јуни.
[FAG id=24509]