Дарко Јаконов
Гигантскиот добавувач на автоиндустријата Bosch купи калифорниска старт-ап компанија чиишто батерии овозможуваат значително зголемување на досегот на електричните автомобили.
Bosch е новиот сопственик на американскиот производител на батерии Seeo. Оваа старт-ап компанија од Калифорнија развива батерии што меѓу другото може да најдат примена и во електричните автомобили. Главниот недостаток на автомобилите со погон на струја во споредба со возилата со конвенционален погон е малиот досег. Енергетската густина на батериите од Seeo ја надминува конкуренцијата за 50 до 100 проценти, со што драстично би се зголемил досегот на електричните автомобили. Литиум-полимер батериите на Seeo имаат енеретска густина од 350 ватчасови по килограм, што е двапати повеќе отколку кај батериите во денешните автомобили на струја.
Покрај поголемиот капацитет, батериите на Seeo се полесни и побезбедни
Според производителот, други предности на батериите DryLyte се пониската тежина, како и повисоката безбедност, затоа што полимер-електролитските ќелии не се запаливи толку лесно како обичните литиум-јонски батерии.
Пазарните аналитичари наведуваат дека калифорнискиот производител е пред преоѓање од технологија на катоди од литиум-железен фосфат на катоди од никел-кобалт-алуминиум. Со тоа уште повеќе ќе се зголеми предноста пред конкуренцијата. Техниката сепак нема достигнато стадиум за пуштање во продажба, за што се неопходни нови инвеститори и време. Seeo во моментов е во потрага по партнер за соработка, заради зголемување на производствените капацитети.
Финансиските детали од преземањето на калифорниската фирма од страна на германскиот Bosch уште не се познати.
