за

BMW набави кобалт вреден 100 милиони евра од Мароко

BMW обезбеди кобалт вреден 100 милиони евра од Мароко
BMW обезбеди кобалт вреден 100 милиони евра од Мароко

Групацијата BMW отсега самостојно го набавува кобалтот што е една од клучните суровини за изработка на батериски ќелии. За таа цел е потпишан договор со мароканската компанија Managem, којашто ќе го испорачува кобалтот од своите рудници. Договорот е во вредност од 100 милиони евра, а количината одговара на една петина од вкупната потреба на BMW за своите електрични возила. Останатите четири петини ќе пристигаат од Австралија. Договорот важи до 2025 година.

BMW планира до 2023 година да нуди 25 модели со електрифициран погон, од кои половината со погон само на струја. Покрај BMW i3, чијашто продукција надмина 160.000 примероци, од моделите што возат само на струја, групацијата моментно го нуди Mini, следeн е BMW iX3, во 2021 година пристигаат кросоверот iNext и BMW i4. Во следните пет години, компанијата очекува трикратно зголемување на потребата од кобалт.

При набавката на суровини се посветува многу внимание во нивното потекло, со цел да се испочитуваат сите стандарди за зачувување на животната средина, како и човечките права. BMW на својот вебсајт објавува од кои земји го набавува кобалтот. Годинава ќе почне и самостојна набавка на литиум, кој понатаму ќе им се испорачува на двата производители на батериски ќелии CATL (договор со 2031 година, вреден 7,3 милијарди евра) и Samsung (до 2031 година, 2,9 милијарди евра). Од следната година, BMW повеќе нема да користи ретки метали во своите батерии.

За производството на батерии се користи само зелена струја, а количината на СО2 од којашто на тој начин ќе биде поштедена животната средина изнесува 10 милиони тони во следните 10 години. За производство на автомобил со погон на струја, околу 40 проценти од емисијата на СО2 отпаѓаат на изработката на батеријата.

BMW самостојно произведува батерии во Динголфинг / Германија, Спартанбург / САД и Шенјанг / Кина. Со групацијата Dräxlmaier се произведуваат батерии и за локалниот пазар во Тајланд. Технолошки партнери во подрачјето на батериите се шведскиот производител Northvolt и белгиската компанија Umicore, којашто работи на развој на материјали за батерии.

Продажбата на електрични возила во следниот период ќе се зголемува за околу 30 проценти годишно. Од 2021 година, уделот на електрични возила ќе достигне една четвртина, во 2025 година тој ќе се зголеми на третина, а во 2030 година половина од продажбата ќе отпаѓа на електрични и плагин хибридни возила.

До крајот на минатата година, BMW продаде повеќе од половина милион електрични или плагин хибридни автомобили.

>>> BMW вчитува нов софтвер во автомобилите – преку телефон

Какво е Вашето мислење

Дарко Јаконов

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Коментари

Напишете коментар

Вашата адреса за е-пошта нема да биде објавена. Задолжителните полиња се означени со *

Вчитувам

0
jaguar land rover pameten paricnik

Поранешен директор на BMW ќе го спасува Jaguar Land Rover

jaguar land rover fabrika

Кризата во Land Rover се пренесе и во DHL