Дарко Јаконов
Државното обвинителство во Минхен не најде докази дека BMW користел недозволени уреди за лажирање на вредностите на издувните гасови во своите дизел мотори, но производителот сепак мора да плати казна, затоа што не ја спречил можноста за грешка при монтажата. Поради погрешно вчитан софтвер, 8.000 автомобили лани мораа да ја посетат сервисната работилница.
Државното обвинителство во Минхен денес објави соопштение во коешто се наведува дека BMW ги почитувал законите и не ги лажирал вредностите на издувните гасови, со цел да добие подобри вредности за пред властите. Меѓутоа, истражувањата докажале дека во контролната електроника на „погодените“ модели BMW M550xd и 750xd биле вчитани податоци за контролната електроника што биле наменети за други модели на BMW. Поради тоа, овие модели испуштале преголема количина азотни оксиди, и на пробните валци и во реални услови на возење.
Парична казна за BMW во висина од 8,5 милиони евра
Според обвинителството, BMW не ја спречил можноста за настанување на оваа грешка со примена на соодветен систем за проверка на квалитетот. Поради тоа е изречена парична казна, за ненамерно повредување на обврската за контрола на квалитетот.
Кога по налог на Сојузната агенција за моторен сообраќај, лани беше измерена прекумерна количина на азотни оксиди кај два модела на BMW, производителот се „правдаше“ дека тоа било предизвикано од погрешно вчитаниот софтвер, кој бил наменет за други возила со дизел мотор. Обвинителството не го оспорува тоа, но го казни BMW за тоа што не ја спречил можноста за вчитување погрешен софтвер
Производителот не ја обжалува паричната казна во висина од 8,5 милиони евра. Вчитувањето на погрешниот софтверски модул била грешка на работниците во монтажата. Погодените автомобили на BMW добија нов софтвер лани.
