По автомобилите следуваат и мотоциклите на Баварците. BMW C evolution е нивниот прв модел со погон на струја. Макси скутерот минува до 100 километри со полни батерии.
Три и пол години траеше целиот развоен процес на електроскутерот на BMW. Неговото производство се одвива во фабриката во Берлин, на посебна монтажна лента на површина од 800 метри квадратни, каде што висококвалификувани работници за работа со струја со висок напон го монтираат скутерот во само неколку чекори.
Почетокот на производството на C evolution означува ново поглавје во историјата на фабриката на BMW во Берлин. Овие погони имаат три основни надлежности: Монтажа на возилото, составување на високоволтната батерија од одделни батериски модули и компетентна анализа. Голем дел од сознанијата во развојот на електричниот автомобил BMW i3 е применети и за скутерот. Основа на техниката се литиум јонските батерии, исти како кај BMW i3, кои се испорачуваат од фабриката во Динголфинг. Три такви модули со по 12 батериски ќелии се комплетираат во алуминиумско куќиште.
Погонската единица на C evolution се состои од синхронен електромотор, запчест ремен и преносник. Номиналната моќност на електромоторот изнесува 11 киловати, односно 15 КС, а крајната брзина е електронски ограничена на 120 km/h. Забрзувањето е споредливо со макси скутерите со обични мотори со 600 сантиметри кубни. Капацитетот на батеријата од 8 киловатчасови овозможува досег до 100 километри. Полнењето трае околу 4 часови на обична струјна мрежа со напон од 220 волти.