Европа до 2035 година ќе ја ограничи количината на комунален отпад што може да се носи на депонии на само 10 проценти. Неколку партнери започнуваат проект вреден 4,3 милиони евра, којшто треба да обезбеди иднина на метанот од биолошко потекло како погонско гориво во возилата.
Европската Комисија неодамна го одобри проектот во којшто ќе се произведува метан од комунален отпад. Во проектот учествуваат неколку партнери, кои во следните четири години имаат на располагање 4,3 милиони евра, да ја тестираат целата постапка, вклучувајќи и користење на метанот како погонско гориво. ЕУ учествува со 55 проценти во вкупниот истражувачки фонд, остатокот го вложуваат партнерите во проектот.
Проектот е замислен како темел за натамошен развој и истражување на производството и примената на биометанот како погонско гориво. Целта е да се постигне апсолутно неутрален систем во поглед на емисијата на СО2.
Европската Унија до 2035 година ќе ја ограничи количината на комунален отпад што може да се носи на депонии на само 10%. претворањето на отпадот во погонско гориво од биолошко потекло е едно од решенијата за надминување на овој предизвик од Унијата.
Во Европа постојат близу половина милион депонии, што значи дека истражувањето на начините како отпадот да се претвори во енергија претставува одлична можност за бизнисот. Во исто време се смалува и емисијата на штетни гасови.