Успехот на Renault со издигнувањето на Dacia наведе повеќе производители да размислуваат и тие да воведат своја евтина марка. Fiat и Nissan се блиску да направат сличен чекор. Италијанците размислуваат повторно да ја заживеат марката Autobianchi, која згасна во 1995 година, по четиридецениско постоење. Во Полска и во Русија ќе се произведува компактна лимузина со техника од стариот Fiat Punto, наменета првенствено за пазарите во Источна Европа. Цената на моделот би изнесувала околу 5.000 евра, без давачки. Ако шефовите се согласат, првите возила може да излезат од фабриките веќе кон крајот на 2014 година.
Nissan исто така планира да врати во живот стара марка. Во март 2014 година ќе стартува продажбата на новите модели на Datsun, кои што ќе се произведуваат во Русија. За почеток понудата ќе опфаќа два модела, лимузина и комбилузина врз база на стариот Nissan Note. Годишната продукција е планирана на 100.000 примероци.