171
22 shares, 171 points

Спортската изведба S8 ја крунисува понудата во гамата на знаменосецот на Audi. Четирилитарскиот V8 со битурбо натполнење ослободува 571 КС и постигнува вртежен момент од 800 њутнметри. Благ хибрид со 48-волтна мрежа и стартер-алтернатор ја намалува потрошувачката на гориво за осум децилитри на сто километри. Натамошна заштеда се постигнува со исклучување на дел од цилиндрите при ниско оптоварување на моторот.

Стандардно се вградува активно подвозје со пневматска амортизација, познато од Audi A8. Со помош на електромеханички активатори, системот може секое тркало одделно да го подигне или спушти. На тој начин се регулира положбата на каросеријата и се спречува „потонување“ или подигнување на носот при силно сопирање или забрзување.

New photo by Automedia MK / Google Photos

Благодарение на предната камера што ги препознава поголемите нерамнини на патот, подвозјето се подготвува да реагира уште пред тркалата да прегазат преку нерамината. Новитет е функцијата „комфор +“, во којашто се дозволува страничното наведнување на каросеријата во свијоци да достигне најмногу 3 степени, со што динамичното возење станува попријатно за патниците.

Кога ќе се повлече рачката на вратата, каросеријата се подигнува за 50 милиметри, заради полесен пристап

Динамичното управување на сите тркала соодветно го приспособува аголот на вртење на тркалата на предната и на задната оска. Спортскиот диференцијал во брзи свијоци активно го распределува вртежниот момент меѓу задните тркала. Со доплата се вградуваат спортски сопирачки, со карбон-керамички дискови.

New photo by Automedia MK / Google Photos

За лимузината долга 5,17 метри може да се избираат бандажи со пречник до 21 инчи. Умерено динамични детали во предниот браник, во страничните прагови и во куќиштето на ретровизорите го нагласуваат спортскиот карактер на автомобилот, заедно со препознатливите двојни издувни цевки за S-моделите на Audi, по една од секоја страна.

New photo by Automedia MK / Google Photos

Импресивна е понудата од вкупно 38 системи за асистенција, кои се поделени во два пакети. Приспособливиот автопилот е главен во пакетот „Tour“, кој вклучува темпомат, самостојно поаѓање и забрзување при возење во колона, како и систем за следење лента. Вториот пакет содржи системи за подобрување на безбедноста при градско возење. Посебна функција има активното подвозје, коешто при опасност од незгода за миг ја подигнува каросеријата за осум сантиметри. На тој начин, заштитните каросериски структури доаѓаат во подобра положба за апсорбирање на енергиајата на судирот.

New photo by Automedia MK / Google Photos

Audi првпат ќе го нуди S8 на пазарите во Кина, САД, Канада и Јужна Кореја, кадешто спортската лимузина ќе се испорачува само во продолжена изведба

Инструментите се целосно дигитални, со два различни прикази. Во едниот се прикажуваат два кружни инструменти во класичен стил, додека во другиот приказ, главно се гледа навигациската карта. Проекциски дисплеј се вградува како дополнителна опрема. Истото важи и за говорните услуги на Амазон Алекса. Престижниот и брз Audi S8 комуницира и со семафорите, за возачот да ја приспособи брзината со вклучувањето на зеленото светло, со помош на бројачот што се покажува во инструментите.

Цените ќе бидат објавени наскоро, Audi стартува со нарачки наесен.


Ти се допаѓа? Сподели со пријателите!

171
22 shares, 171 points
Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

0 Comments

Вашата адреса за е-пошта нема да биде објавена. Задолжителните полиња се означени со *