Шефот Руперт Штадлер потврди дека најмалечкиот модел на Audi наскоро ќе добие мотор со три цилиндри, а по него ќе следи и компактот А3. Еднолитарецот со 90 КС моментно се вградува во Polo и Up.
За време на одржувањето на салонот во Пекинг, шефот на Audi најави дека трицилиндарските мотори наскоро ќе почнат да се вградуваат и во најмалечките два модела на германската премиум марка. Руперт Штадлер тврди дека моторите нудат доволна динамика и солидно повлекување. Прв модел на Audi со трицилиндарски мотор ќе биде најмалечкиот во понудата и технички близнак на Volkswagen Polo, моделот A1.
Според првиот човек на марката од Инголштат, пред петнаесет години било задолжително моделите во вишата класа да користат шестцилиндарски мотори, додека денес истата задача без проблеми ја вршат и помали четирицилиндарци. Оттаму, нема да биде необично кога во блиска иднина трицилиндарските мотори ќе станат стандард во основната понуда на помалите модели.
Audi ќе го користи трицилиндарскиот мотор со зафатнина од 1,0 литар што Volkswagen моментно го вградува во моделите Up и Polo, каде што постигнува моќност до 90 КС. Моделите на Audi ќе имаат малку поголема моќност од тоа. Смалувањето на моторите ги опфати и многу поголемите класи на возила. Ford веќе потврди дека новата генерација на моделот од средната класа Mondeo ќе го добие еднолитарскиот мотор со три цилиндри од Fiesta и Focus, а се очекува истиот потег да го направи и BMW во основниот модел на серијата 5.