Дарко Јаконов
Здравјето на вработените е од голема важност во Audi. Во фабриката во Некарсулм се тестира нова технологија што ќе ја олесни работата на монтажните ленти: Столица без столица.
Работниците во фабриката на Audi во Некарсулм отсега вистински ќе уживаат во работата. Тие добија „столчиња без столчиња“, изработени од карбон и изведени според последна технологија, коишто овозможуваат при работата да се заземе положба на седење, но без столица. На тој начин се постигнува поправилна положба на телото и се растоваруваат нозете.
„Безстолната столица“ е еден од неколкуте проекти што Audi ги води во ергономијата во производството веќе неколку години. Со нив е попријатна работата и не се нарушува здравјето, а од друга страна, се постигнуваат поголема продуктивност и повисок квалитет во работата. Audi ја разви иновативната столица во соработка со стартап претпријатие од Швајцарија и таа претставува егзоскелет што се носи од задната страна на нозете. Столицата се прицврстува на појасот, колената и на зглобовите со помош на ремени. Две површини обложени со кожа служат како потпора за задникот и кукот, а двете половини изработени од карбон се приспособуваат според формата на ногата. Овие половини се споени со зглоб и се местат хидраулично според висината и според саканата положба за седење. Тежината е само 2,4 килограми.
Три варијанти од новите столици од пред неколку денови се тестираат во монтажата на моделите Audi A4 и Audi A6, конкретно во подготовката за монтажа на кокпитот, кадешто досега се работеше само стоејќи. Во мај ќе започне тестирањето и во фабриката во Ингоштат, за потоа да стартува и редовна примена на столицата во производствениот процес.
