Дарко Јаконов
Две е подобро од една. Aston Martin го почитува ова искуство и премиерата на Vanquish Zagato Coupe на собирот во Калифорнија ја придружува со премиера и на кабриолет изведбата од спектакуларниот модел.
За дизајнерското парче Vanquish Zagato Coupe да не остане „осамено“ на традиционалниот собир на богати и убави во калифорнискиот Пебл Бич, Aston Martin веднаш ја испраќа и кабриолет изведбата од моделот. Исто како купето, Vanquish Zagato Volante ќе се изработи во серија ограничена на 99 примероци.
Кабриолетот е последен модел од соработката со култната каросериска работилница од Милано, којашто датира уште од пред шест децении, почнувајќи од тркачкиот DB4 GT Zagato од 1960 година, па се до DB7 Vantage Zagato од 2002, V12 Vantage Zagato од 2011 и купето Vanquish Zagato од годинава.
Под хаубата работи V12 со 600 КС, на кого 3,8 секунди му се доволни да го катапултира Volante до сто километри на час. Кабриолетот ги наследува препознатливите дизајнерски елементи од купето, како задните тркалезни светла во стил на хиперавтомобилот Vulcan. Впечатливо изгледаат задните крила коишто преоѓаат кон хаубата и создаваат силен печат во појавата на благородниот британски автомобил за уживање на отворено. На тоа се надоврзуваат и карбонските панели во долниот дел од опашот.
Сопственото одделение за специјални доработки Q, не случајно именувано по главниот добавувач со спектакуларни изуми на Џејмс Бонд, ќе се погрижи внатрешноста на Vanquish Zagato Volante да добие посебен печат по барање на клиентот, како карбонски влакна испреплетени како коска на харинга, детали од анодизирана бронза или најфина кожа „Bridge of Weir“. Шарата на седиштата и вратите стандардно е изведена во „Z“, а оваа буква како заштитен знак на Zagato е наоѓа и на потпирачите за глава и во средишната конзола.
[FAG id=25229]
