Дарко Јаконов
Од фабриката на Škoda во Квасини излезе првиот Superb од третата генерација. Производствените погони беа темелно обновени и проширени за новиот модел.
Од производствените погони во фабриката на Škoda во Квасини се симна првиот примерок од третата генерација на Superb. Производствените погони се комплетно модернизирани и проширени за новиот модел. Покрај изградбата на нова хала за изработка на каросеријата на Superb, проширени се и постоечките производствени хали. За почетокот со производството на новата Škoda Superb е инвестирано и во нови производствени технологии. Само во новата хала за изработка на каросерии се инвестирани дури 62,3 милиони евра, а за следните години се планира натамошно проширување на фабриката.
Третата генерација на Škoda Superb воведува целосно нов дизајнерски идентитет на чешката марка и нуди уште повеќе простор и комфор во споредба со претходникот, како резултат од користењето на платформата MQB на концернот Volkswagen. Superb е на врвот на моделската палета на Škoda од 2001 година, со повеќе од 700.000 произведени примероци досега, што го вбројува меѓу најпопуларните модели во средната класа.
Квасини е една од трите производствени локации во Чешка и моментно вработува 4.500 лица. Покрај Superb, во фабриката се произведуваат и моделите Roomster и Yeti. Лани во Квасини се произведоа 166.200 возила.
