Само два дизела се чисти според еко-тестот на ADAC

Последното тестирање на еколошката подносливост на модели со дизел и бензински мотор од клубот ADAC покажа големи отстапувања од законски дозволените вредности. Дизелите и натаму се критични, но се покажуваат проблеми и кај бензинците со директно впрскување. Покрај тоа, некои модели со Euro 6 се еколошки послаби во споредба со моделите со Euro 5.

Вознемирувачки резултати од последното тестирање на квалитетот на издувните гасови на 38 модели со дизел мотор. Само два модела минаа примерно на еко-тестот на клубот ADAC: Mercedes E220 d 9G-Tronic и BMW 118d Urban Line Steptronic. Тоа се единствените модели со дизел мотор што освоија четири еко-ѕвезди и ја заслужија препораката од клубот.

Лошите резултати на автомобилите со дизел мотор во најголем дел се должат на неколкукратното надминување на законските гранични вредности за емисијата на азотни оксиди. Најголемото отстапување од законските прописи е регистрирано кај Renault Captur dCi 90, на когошто на еко-тестот на ADAC му беше измерена просечна емисија на азотни оксиди од 725 милиграми на километар, што е повеќе од деветпати над дозволената вредност.

Повторно се докажува дека производителите манупилираат со вредностите на издувните гасови

Новите модели не мора секогаш да бидат и почисти. Напротив, неколку актуелни модели со емисија според Euro 6 на еко-тестот на ADAC покажуваат повисоки вредности отколку моделите од класата Euro 5. Овие резултати одат во прилог на најавените забрани за пристап на возила со дизел мотор во центарот на повеќе градови низ Европа.

Додека повеќето дизели имаат проблеми со превисоката емисија на азотни оксиди, голем број бензински мотори со директно впрскување покажуваат превисоки вредности на емисијата на ситни честички PM во издувот. Тоа не се однесува само на моќните бензинци како Ford Focus RS, туку и на моделите што се повеќе застапени во сообраќајот, како Volkswagen Tiguan 1.4 TSI или Opel Corsa 1.0 Turbo ecoFlex Edition. Овие модели не добиваат ниту по еден бод за нивната нештетност врз животната средина. Покрај тоа, кај Opel за првпат се измерени и зголемени вредности на азотни оксиди, што досега не беше случај кај бензинците.

Во новите модели и натаму не се вградуваат ефикасни, но и поскапи системи за пречистување

Според ADAC, користените издувни системи кај повеќето модели со бензински или дизел мотор се под нивото на техничката изводливост што им е достапна на производителите. Клубот ги критикува производителите на автомобили поради тоа што преземаат премалку во поглед на заштитата на животната средина и не ги користат ефективните технологии што постојат веќе со години.

Првите места на еко-тестот на ADAC моментно им припаѓаат на моделите со елелтричен или хибриден погон, односно на BMW i3, Toyota Prius 1.8 Hybrid Executive и Nissan Leaf Acenta. Највисоки оцени добива и Toyota Mirai, којшто користи водород како погонско гориво. Пет модели со бензински мотор освоија четири ѕвезди и со тоа ја заслужија и препораката од клубот. Најчист бензинец е Suzuki Ignis 1.2 SHVS Comfort+. Од трите тестирани плагин-хибриди, ниту еден не ги освои „препорачливите“ четири или пет еко-ѕвезди од ADAC.

Најголемиот автомобилски клуб во Европа користи далеку пореални критериуми при тестирањето, отколку производителите и државните институции. Покрај тоа што ADAC ги применува новите циклуси на возење и строги стандарди за оценување, постои уште еден новитет: Автомобилите што ќе добијат препорака, односно четири или пет ѕвезди при тестирањето на пробни валци, потоа мора да ја докажат својата еколошка подносливост и во реални услови на возење, на улица.

Најдобро и најлошо пласирани модели според еко-тестот на ADAC

Според новата метода на еко-тестирање на клубот ADAC досега се проверени 77 модели. Резултатот: Со пет ѕвезди водат автомобили со електро и хибриден погон, но и еден модел со погон на метан ја докажува еколошката погодност на ова гориво. Suzuki Baleno е најдобро пласиран модел со бензински мотор, којшто сепак добива мала помош од електромотор и функционира како паралелен хибрид, но очигледно и таа помош е сосем доволна. Само две места погоре е Toyota Yaris со сериски хибрид и исто така со одлични четири ѕвезди за еколошката подносливост.