Дарко Јаконов
Јапонската лимузина со боксер мотори и погон на сите тркала доживеа премиера како сериски модел на салонот во Чикаго. Под хаубата и натаму работат боксер мотори.
Само две работи останаа непроменети во новата генерација на Subaru Legacy. Под хаубата и натаму работат боксер мотори, а погонот на сите тркала е стандард во сите моделски изведби. Во сите други подрачја се случи револуција. Новиот Subaru Legacy е многу попросторен од стариот. Тоа се овозможи со поместувањето на патничката кабина нанапред, заедно со ветробранското стакло. За подоброто просторно чувство придонесуваат и потесните облоги на вратите. На крај, порасна и багажникот.
Боксер моторите се специјалност на Subaru
Изгледот на новиот модел од средната класа е значително подинамичен, но за пофалба е и тоа што останаа препознатливите белези на марката. Во стилот на куќата, серискиот модел изгледа мошне слично со студискиот автомобил што беше прикажан во минатата есен во Лос Анџелес. Разликата е првенствено во тоа хаубата е изработена од алуминиум, а предната маска има активна решетка што се затвора при повисока брзина и со тоа ја подобрува аеродинамиката.
Под алуминиумската хауба работат боксер мотори со четири и шест цилиндри. Основниот четирицилиндарец има 2,5 литри зафатнина и моќност од 178 КС, додека шестцилиндарскиот мотор ги црпи 260-те КС од 3,6 литри зафатнина. Обата мотора за американскиот пазар се нудат во комбинација со менувач со променлив преносен однос. На европскиот пазар ќе се нуди уште еден четирицилиндарец и задолжителниот дизел. Последната верзија на електронски контролираниот симетричен погон на сите тркала го распределува вртежниот момент различно на сите четири тркала.
Комплетна промена доживеа и командната табла, која што сега оддава поубедлив впечаток за квалитет. Во понудата на системи за асистенција се наоѓаат систем за следење лента и систем за контрола на мртвите агли, како и предупредување на крстосница, кога попречно наидува автомобил.
