Honda планира да развие верзија со намалена тежина од новиот NSX, којашто ќе биде наменета првенствено за тркачките патеки и ќе има погон само на задните тркала.
Во Honda се размислува за развој на тркачка изведба од новата генерација на суперспортскиот NSX, во којашто нема да се вградуваат двата електромотора за предната оска од стандардниот модел, исто како и батерискиот модул. На тој начин тежината на возилото ќе се намали за неколку стотини килограми. Задниот електромотор меѓу бензинецот и менувачот сепак ќе остане и ќе се користи како стартер-генератор. Само со отстранувањето на хибридната погонска спрега ќе се заштедат 150 килограми.
Стандардниот NSX тежи 1.750 килограми и задвижуван е од 3,5-литарски V6, еден електромотор на задната оска и два електромотора за предните тркала. Системската моќност изнесува 573 КС. Honda уште нема дадено зелено светло за NSX Type-R, но постои голема расположеност за овој модел којшто може да придонесе за враќање на традиционалниот спортски дух на марката. На следниот Пајкс Пик ќе се пуштат два фабрички подржани тима со NSX со заден погон.
Можно е NSX Type-R да се изведе со активни елементи за аеродинамика, што веќе е тестирано на неколку прототипи во развојната фаза на моделот. Секако дека се размислува и за родстер изведба од NSX, верно на традицијата на моделот. Продажбата на NSX на европскиот пазар стартува во април, по цена од 180.000 евра, а испораката ќе следува наесен.