Примерок на Porsche со значајно историско минато ќе се најде на наддавање во Њујорк во средината на декември. Станува збор за автомобилот на Џенис Џоплин, а неговата вредност се проценува на најмалку 400.000 долари.
Во една од нејзините најпознати песни, Џенис Џоплин бара нејзиниот човек да ѝ купи Mercedes-Benz. Во тоа време, музичката легенда веќе долго време се вози во Porsche 356C 1600 Cabriolet. Џоплин го купила белиот Porsche во септември 1968 година за 3.500 долари и го испратила да се прелакира во психоделични тонови кај нејзин пријател. Оттогаш, по каросеријата на кабриолетот летаат пеперутки, расцутуваат цвеќиња и се гледаат портрети од членовите на бендот. Автомобилот често пати бил гледан по улиците на Сан Франциско. Тој бил паркиран и пред хотелот во Холивуд, кога кралицата на рокенролот на 4-ти октомври 1970 година починала од предозирање со хероин.
По смртта на Џоплин, автомобилот останал во семејна сопственост и две децении бил изложен во галеријата на славните во Кливленд. Семејството сега решило да го понуди автомобилот на наддавање. Реномираната аукциска куќа Сотби ќе прима понуди за историскиот автомобил на 10-ти декември, при што се очекува тој да достигне вредност од најмалку 400.000 долари. Но, кога станува збор за автомобили со значајно историско минато, вредноста на наддавањето може да се зголеми и неколкукратно.