Дарко Јаконов
Производителите на автомобили се подготвуваат за салонот во кинескиот Ченгду, кој се отвора за нешто повеќе од една недела. Citroen ќе ја прикаже сериската верзија на DS 6WR –наменет само за локалниот пазар.
Кинеските портали денес ги објавија фотографиите од сериската верзија на кросоверот што произлезе од концептниот автомобил DS Wild Rubis. Со меѓуоскино растојание од 2,73 метри и каросерија долга 4,55 метри, Citroen DS 6 WR е за педа помал од Audi Q5, но е подеднакво претставителен. Ентериерот на фотографиите изгледа дека е педантно изработен, а во поглед на дизајнот се ориентира според DS 5LS. Под хаубата работи 1,6-литарски бензинец со турбонатполнење, во верзии со 163 КС и 200 КС. Подоцна во понудата ќе влезе и поевтина верзија со 1,8-литарски атмосферски бензинец со 139 КС. Во поглед на достапноста на овој интересен кросовер на европскиот пазар и натаму нема официјална потврда од Citroen. Кросоверот DS 6 WR е производ од соработката меѓу францускиот Citroenи домашниот Dongfeng Peugeot, соодветно на „стандардот“ на кинеските власти, странските производители да се обврзат на соработка со кинеска фирма доколку сакаат да произведуваат во земјата.
