Kia Motors премиерно го претсави новиот Kia Sorento во Кореја. Третата генерација доби повеќе стил, поголема практичност и понапредна технологија од претходникот.
Новиот знаменосец во програмата од теренци на Kia посредува поубедлива доза на престиж, има повеќе простор во кабината и има неколку свежи детали во опремата. Европската премиера на новиот Sorento е најавена за 2-ри октомври на салонот во Париз. Главен печат во изгледот на предниот дел од возилото даваат долгите светла коишто се развлечени наназад, исто како и впечатливите магленки и поголемата, речиси исправена маска во типичниот изглед на „тигарски нос“ на Kia. Исто како и студијата Kia Cross GT од салонот во Чикаго пред една година, маската има карактеристична тридимензионална мустра, којашто оддава впечаток како да е украсена со дијаманти.
Отстрана се забележува долгата хауба и широките задни столбови, како како заштитен белег на Sorento. Понискиот покрив, повисокиот страничен појас на каросеријата и во целина подинамичните контури му даваат атлетски став на новиот Sorento. Спојот на динамика и елеганција е нагласен со подолгата каросерија (+95 mm, сега 4,78 метри), понискиот покрив (-15 mm) и ширината поголема за 5 mm.
Едно од најважните подобрувања во третата моделска генерација е ентериерот, за чијшто дизајн беше задолжен центарот за дизајн на Kia во Франкфурт. Резултатот е елегантна кабина со луксузна нота, којашто дополнително се одликува со висок квалитет на материјалите.
Водечкото мото во дизајнот на ентериерот „модерно и широкоградо“ се однесува на концепт на јасни и хоризонтални линии. Тоа се воочува прво во широките инструменти, исто како и во украсните лајсни во кокпитот и во арматурната табла што преоѓа и во вратите. Богатата примена на материјали што се меки на допир и на кожа обезбедува модерно лукузен амбиент и посредува чувство на возило од премиум сегментот.
Со подолгата каросерија и со продолженото меѓуоскино растојание (2,78 метри, +80 mm), новиот Kia Sorento нуди повеќе простор во кабината во споредба со претходникот. Иако покривот е понизок, просторот за глава е зголемен благодарение на новото поставување на седиштата во сите три редови, а повеќе простор има и за нозете. Порасна и багажникот: При соборен трет ред седишта, назад собира 605 место 515 литри, што е зголемување од 17,5 проценти.
Во зависност од пазарот, за Sorento се нудат вкупно пет мотори во спектар на силини меѓу 172 и 270 КС. Основата е 2,4-литарски бензинец во верзија со или без директно впрскување, потоа следува 3,3-литарски бензинец, додека турбодизелите од 2,0, односно 2,2 литри од генерацијата R се преработени и нудат поголема култивираност и пониска потрошувачка на гориво. Како и досега, најпродаван мотор во Европа ќе биде дизелот 2.2 CRDi.
Инженерите на Kia ги подобрија и комфорот во возење, стабилноста при високи брзини и повратната информација во управувањето. Во водењето на тркалата е задржан концептот на претходникот, со мекферсон напред и оска со поевќе водилки назад, но модифициран е во повеќе подрачја.