Дарко Јаконов
Еден од најочекуваните новитети на нашиот пазар пристига веќе во следниот месец. Ford Mondeo 1.6 TDCi со 115 КС и ниво на опрема Trend повторно ќе биде меѓу најисплатливите модели во класата.
Веќе во средината на декември стартува новата генерација на Ford Mondeo на македонскиот пазар. Раното пристигање на новиот знаменосец на Ford е само првото пријатно изненадување од Ми-Да Гранд Моторс. Во 2015 година претстојат многу премиери на нови модели на Ford на македонскиот пазар, вклучувајќи го и култното име Mustang. Во следната година ќе имаме речиси целосно обновување на моделската гама на марката со сината слива, со повеќе моделски имиња што премиерно се појавуваат на пазарот.
Моделската офанзива на Ford започнува уште во оваа година, во средината на декември, кога стартува продажбата на новата генерација на моделот од средната класа Mondeo. Во понудата од погонски единици влегуваат истите мотори како на западноевропскиот пазар, вклучувајќи го новиот 1,5-литарски четирицилиндарец со турбонатполнење и директно впрскување на горивото, како поголем брат на еднолитарскиот EcoBoost – повеќекратен носител на титулата на светски мотор на годината. Со овој мотор со моќност од 160 КС и декларирана просечна потрошувачка од 5,8 литри на сто километри ќе стартува ценовникот на Mondeo.
Најсилниот бензинец во новиот Mondeo вози со 240 КС
Македонскиот пазар сепак повеќе ги преферира дизелските модели во оваа класа. Mondeo 1.6 TDCi со 115 КС и просек од 4,2 L/100 km, во нивото на опрема Trend, официјално ќе стартува на нашиот пазар од 23.900 евра. Бензинската понуда ја дополнува 2.0 Ecoboost со 240 КС, додека кај дизелите стојат на располагање двете верзии со дволитарскиот дизел, првата со 150 КС, втората со 180 КС. Сите мотори, со исклучок на дволитарецот со 240 КС, којшто следува во комбинација со шестстепен автоматски менувач, стандардно поседуваат систем за штедење гориво старт-стоп и шестстепен мануелен менувач.
За дволитарскиот бензинец и сите дизелски модели е достапно и повисокото ниво Titanium, кое според германскиот ценовник вклучува дополнително средишен дисплеј на допир од 20 инчи, ракување преку говорни команди, собирање на ретровизори, автоматика за долго светло, копче за стартување, темпомат, автоматика на бришачи и светла, спортски седишта и алу-бандажи од 17 инчи. Точната спецификација на ова ниво исто така ќе биде потврдена со комерцијализацијата на моделот.
За првпат модел со хибриден погон во гамата на Mondeo
Во новата генерација на Mondeo за првпат ќе се нуди и модел со хибриден погон, во комбинација од дволитарски бензинец и електромотор со системска моќност од 187 КС и потрошувачка од 4,2 литри на сто километри. Хибридниот Mondeo би бил особено интересен за нашиот пазар од аспект на акцизното ослободување на автомобилите со „електрифициран“ погон. Засега не е планирано овој „Mondeo со две срца“ да биде вклучен во ценовникот на Ford за македонскиот пазар, што од друга страна е поврзано и со прифатеноста на хибридниот погон во поширокиот регион. Во секој случај станува збор за можна заштеда на акцизата во висина од 5.400 евра, односно околу 6.400 евра вклучувајќи го данокот од 18 проценти. Mondeo Hybrid е воедно и единствен во гамата што ќе биде достапен со лимузинската форма на каросеријата, наспроти останатите модели коишто се нудат само во комбилимузинска изведба со пет врати и во комби изведба Turnier.
Новиот Mondeo повторно настапува со најдобра противвредност во класата
Одговорот на прашањето што го поставуваат пазарните лисеци пред почетокот на продажбата на секоја нова моделска генерација гласи: Не! Од моделот од претходната генерација на Mondeo, со редовна цена од 18.200 евра за бензинецот и 22.000 евра за дизелот, во комбинација со почетното ниво Ambiente, повеќе нема примероци на располагање. Во директна споредба, новиот Mondeo во верзија со 1,6-литарски дизел со 115 КС и ниво Trend ќе биде само 300 евра поскап од претходникот, што значи дека генерациската смена не само што не е „болна“ во ценовна смисла, туку нуди и поголема противвредност, ако се земат во предвид дополнителните ставки во опремата и унапредената технологија – и секако фактот што за комбилимузинската каросериска изведба досега мораше да се плати дополнително.
Освеженото моделско годиште на Focus чини само 400 евра повеќе од претходникот
Стратешкото обновување на моделската гама на Ford продолжува со фејслифтот на моментно најпродаваниот автомобил во светот, компактот Focus, чијшто старт на македонскиот пазар се очекува кон крајот на декември и почетокот на јануари. Во последно време честопати се случуваше фејслифтите да настапат со драстично повисока цена, условено од новите системи што постојано пристигаат во браншата и ја прават конкурентската трка уште поостра, но очигледно дека нема причина за таква загриженост кај компактот на Ford. Новиот Focus ќе стартува од 14.300 евра за бензинската варијанта 1.6 Ti-VCT со 85 КС, односно 400 евра повеќе од претходникот. Кој се смета за добар преговарач веројатно може да направи добра зделка за примерок од сегашниот модел, од когошто уште стојат на располагање неколку примероци.
И Ford се впушта во вжештената конкурентска битка на кросоверите
Големо освежување претставува доаѓањето на компактниот кросовер EcoSport, којшто од оваа генерација ќе се нуди глобално, за разлика од претходникот што беше резервиран исклучиво за јужноамериканските пазари, кадешто постигна впечатливи успеси во продажбата. Техничката основа на кросоверот со должина од четири метри доаѓа од Fiesta, а понудата на мотори ја сочинуваат 
Нема наследник на Capri, но затоа има уште подобро – Mustang!
Новитетите не престануваат тука. Напротив, во втората половина од следната година доаѓа најголемото изненадување на нашиот пазар, почетокот на продажбата на американското купе со култен статус – Ford Mustang. За прв пат во педесетгодишната историја на Mustang, моделот се нуди официјално и на европскиот пазар – во согласност со актуелната стратегија на Ford, еден модел да се нуди глобално. Долго време Ford е без купе во средната класа, а уште подолго без достоен наследник на легендарниот Capri. Неговиот наследник не доаѓа, но затоа следува уште подобро: Mustang, како едно од највредните и најзвучни имиња на сите времиња, не само во американската, туку и во глобалната автоиндустрија. Традиционалниот V8 со зафатнина од пет литри и моќност од 418 КС не смее да недостига во Mustang, а покрај него, посебно за европскиот пазар ќе се нуди и 2,3-литарски турбобензинец од генерацијата EcoBoost со 320 КС.
Во средината на следната година претстои голем караван со новите модели низ Македонија
Ниту вановите не остануваат без моделско освежување. Во мај следува комерцијализација на компактниот ван C-Max, којшто доживеа премиера на штотуку завршениот салон во Париз, исто како и ванот на база на новиот Mondeo, динамичарот во класата на вановите, Ford S-Max. Последниов треба да пристигне на нашиот пазар кон крајот на вториот квартал, што значи во периодот меѓу јуни и јули следната година. Обновената гама на Ford ја комплетира и новата генерација на Tournier, којшто е веќе достапен на пазарот.
За заокружување на обновувањето на моделската гама, Ми-Да Гранд Моторс планира во периодот на мај или јуни да организира караван низ Македонија, на којшто заинтересираните купувачи и љубителите на марката ќе имаат можност лично да ги испробаат новите модели на Ford. Секако дека во меѓувреме не се исклучени и други изненадувања од марката со синото лого, Focus и Fiesta со значката ST, на пример!
Галерија со сите новитети на Ford за 2015 година
