Дарко Јаконов
Позитивниот тренд во продажбата на марката Audi продолжува и во февруари, за што во моментов најмногу придонесува новиот A4, со над 130.000 нарачки. Голем поттик се очекува и од стартот на новиот Q2.
По добриот почеток на годината, продажбата на Audi продолжува по нагорна линија и во февруари. На светско ниво, марката од Инголштат продаде 126.500 автомобили (+3,3%), додека уште поголем пораст доаѓа од европскиот пазар, со 65.150 возила или плус 8,1 проценти. Последново е резултат од пазарниот старт на новиот Audi A4, со 22.650 продадени возила во минатиот месец. За новиот модел од средната класа досега има над 130.000 нарачки.
Дополнителен поттик ќе следува по стартот на продажбата на три нови модели од сегментот на спортските теренци, Audi Q2, хибридниот Q7 e-tron и спортскиот SQ7. Хибридната изведба на големиот спортски теренец пристига во салоните во текот на летово, заедно со екстремниот спортист SQ7, за во последното тромесечје да следи и стартот на компактниот Audi Q2, штутуку претставен на салонот во Женева. Постоечките модели во овој сегмент во февруари забележаа зголемена продажба од 12,5 проценти, со 37.900 возила.
Покрај A4, за позитивното одвивање на продажбата во Европа придонесуваат и моделите од врвните сегменти, A6, A7, Q7 и A8, со раст од 11,0 проценти во февруари и 10.900 продадени примероци. Сите клучни пазари на континентот се во плус: Германија (11,8%), Велика Британија (+7,3%), Франција (+9,4%), Италија (+12,1%) и Шпанија (+6,9%).
Напролет ќе започне и продажбата на новиот A4 во САД. Во претходниот месец, Audi на овој пазар продаде 11.718 возила или за 2,3 проценти повеќе отколку во ланскиот февруари. На канадскиот пазар одлично се одвива продажбата на Q7. Во Кина, продажбата во февруари обично стивнува, но и покрај тоа е постигнат раст од 1,3 процент, со 34.152 возила. Највисок раст во регионот на Азија и Пацификот забележа австралискиот пазар, со 18% и 2.006 продадени возила, првенствено модели од сегментот на спортските теренци.
