Партнерите General Motors и Avtovaz преку студија ќе ја најават новата генерација на теренецот Chevrolet Niva на претстојниот салон на автомобили во Москва.
На првите фотографии од студијата на идната Chevrolet Niva се забележуваат само контурите на возилото што ќе доживее премиера на 27-ми август, но доволно е да се препознаат неколку детали што укажуваат дека новакот нема да биде урбан кросовер, туку способен теренец, со робусни гуми за терен, заштита на подвозје, со големо растојание од подлогата, подигната издувна цевка и динамична линија на каросеријата. Постојаниот погон на сите тркала е стандард во погонската спрега, а место 1,7-литарскиот бензинец со 80 КС од актуелниот модел, во идната Niva веројатно ќе работи 1,8-литарски бензинец од PSA Peugeot Citroen со 136 КС.
Моментно Chevrolet Niva се соочува со голем пад во продажбата на рускиот пазар. Наследникот ќе стартува со продажба дури во 2016 година.