Дарко Јаконов
Производителите го користат Фестивалот на брзината во англискиот Гудвуд да ги покажат мускулите. Peugeot не останува покус. Купето RCZ-R вози со 270 КС и е најбрз Peugeot во историјата.
Купеата на Peugeot отсекогаш биле впечатливи, повеќе пати со дизајнот, некогаш со моќноста, а сега и со дизајнот и со моќноста. Специјалната изведба RCZ-R извлекува 270 КС од 1,6-литарскиот бензинец со турбонатполнење и со тоа е најсилен сериски Peugeot во историјата, но и неговиот мотор го поставува актуелниот врв со специфичната моќност од 170 КС на еден литар зафатнина. Друг 1,6-литарец не постои со толкава моќност во моментов.
Моќта се пренесува преку шестстепен мануелен менувач, а забрзувањето до сто трае помалку од шест секунди. Французите не ја откриваат крајната брзина, но 250 километри на час се сосема реални. Две коњски сили повеќе ослободува Audi TTS, но за тоа користи и поголем мотор, со зафатнина од два литри.
Во комбинација со посилниот мотор одат посебно дотерано подвозје, поголеми бандажи и торсен блокада на диференцијал, што ветува поголема динамика во возењето и создава основа за примена на RCZ-R на тркачките патеки. Вообичаено за марката со лавот, надворешноста открива само во детали дека станува збор за најсилниот модел. Купето го открива идентитетот само преку поголемите бандажи, спојлерот одзади и дифузорот со интегрирани издувни цевки со поголем пречник. Внатре се вградени спортски седишта, а посебна ознака во средишната конзола открива дека се работи за верзијата R. Официјалната премиера на моделот ќе биде на салонот во Франкфурт во септември, а продажбата ќе стартува в година.
