Дарко Јаконов
Насилнички напад на мотоциклист врз возач на автомобил предизвика верижен судир со трето возило на автопат во САД. Клоца во врата можеше да има кобни последици за сите учесници во незгодата. Но, дали мотоциклистот навистина е виновникот?
Бесна реакција на мотоциклист кој клоца во врата на автомобил по автопат во Калифорнија предизвика превртување на трето возило. На видеото од настанот се гледа како возачот на автомобилот Nissan реагира панично, губи контрола и удира во бетонската ограда, се одбива од неа и потоа се забива во Cadillac кој вози на делницата што се спојува со патот.
Големиот пикап се превртува од силината на ударот, но неговиот 70-годишен возач минува само со површински повреди. Сообраќајот по автопатот во регионот на Санта Кларита останува блокиран половина час, мотоциклистот ладнокрвно се одвезува од местото на незгодата.
Мотоциклист или автомобилист: Кој е виновникот за незгодата?
Повеќето американски медиуми го осудуваат однесувањето на мотоцилистот, по когошто полицијата во меѓувреме започна потрага. Настанот најчесто е оквалификуван како насилство на пат. Но, дали навистина е виновен мотоциклистот?
Настанот е снимен со мобилен телефон, од совозачкото седиште на друг автомобил. Според изјавата на патникот, тој започнал да го снима настанот откако забележал дека се води препирка околу мотоциклистот и возачот на лимузината. Причина за препирката било недозволеното преоѓање на автомобилистот во лентата по којашто возел мотоциклистот. На снимката јасно се забележува дека двојна полна лента ги раздвојува двете различни делници што подоцна се спојуваат.
Тоа што изгледа како панична реакција на возачот всушност е обид да го турне мотоциклистот
Возачот на мотоциклот сигурно нема намера да го преврти автомобилот удирајќи клоца во вртата. Неговата реакција е изразување протест против опасното однесување на автомобилистот. Тоа што некои го гледаат како панична реакција на возачот на автомобилот, кој свртува нагло кон разделната бетонска ограда, всушност е намера на возачот да му го препречи патот на мотоциклистот, па дури и обид да го собори и повреди.
Usually when a biker kicks your door in on the HWY you probably cut him off..Any MC rider will identify with this… https://t.co/RogajZTMsM
— William Billy Leroy (@billysantiques) June 23, 2017
Ова сценарио како од холивудски филм ќе завршеше праведно, доколку автомобилистот не се забиеше во невиниот возач на тешкиот Cadillac. Полицијата не објавува информации за возачот на Nissan. Изјави од сведоци ќе ја докажуваат и неговата вина во незгодата. Можно е против него да биде поднесена прекршочна пријава. Мотоциклистот сепак го напуштил местото. Тоа исто така е прекршок.
