Дарко Јаконов
Новата Opel Insignia синоќа доживеа спектакуларна промоција во Скопје. Тоа што во себе го носи новата генерација на знаменосецот на Opel најавува негово враќање меѓу водечките бизнис лимузини. Insignia не беше единствениот модел со премиера.
За премиера на Opel Insignia на овие простори ништо не може да биде претерано. Во генот на најрепрезентативниот модел од Риселсхајм се „потпишани“ имиња како Ascona, Vectra, а според редот на околностите и на Senator. Сиве икони на четири тркала оставиле траги во автомобилската култура во поширокиот регион, како автомобили од соништата, од оние остварливите.
Затоа не е претерано кога Opel приредува врвна свеченост во чест на пристигањето на новата генерација. Во амбиентот на ресторанот „Four“ во Градскиот парк во Скопје, синоќа се одржа националната премиера на новата Insignia, пред голем број гости, пријатели на марката и новинари.
Г-дин Драган Ненадовиќ, директорот на Opel за Македонија, Србија, Бугарија, Црна Гора и Албанија ја најави Insignia како „автомобил кој нуди квалитети, како што се уживање во возењето, прецизност и удобност, во комбинација со супериорна изработка.“
Новата Opel Insignia е само неколку милиметри покуса од легендарниот Diplomat
И повторно, никоја пофалба не може да биде претерана за тоа што Opel синоќа го претстави за првпат пред македонската јавност. Има и добра поткрепа за тоа. Иако Opel уште пред лансирањето на првата генерација на Insignia пред десетина години најави дека се откажува од лимузините од високата класа, ова што сега се појавува под тоа име е само неколку милиметри покусо од легендарниот Opel Diplomat.
https://www.facebook.com/OpelDE/photos/a.146541872057811.25538.124543347590997/1534536929924958/?type=3
Во 1970-те години, триото Diplomat, Admiral и Commodore на моменти го засенуваше дури и Mercedes S-Class. Под хаубата на ова трио своевремено работеше V8, а сето тоа беше придружено и со соодветен луксуз. Како во Opel одново да стануваат свесни за големината на овие имиња, па новиот модел не е само Insignia, туку е Insignia Grand Sport во лимузинската изведба, односно Insignia Sports Tourer во комби изведбата.
Ценовникот за новата Opel Insignia стартува од 23.000 евра
Основниот модел со 1,5-литарски турбо-бензинец со 140 КС и ниво на опрема Insignia чини 23.036 евра, а бензинската гама ја заокружува 2.0 Turbo со 260 КС, погон на сите тркала и 8-степен автоматик, достапен само во највисоките нивоа на опрема, со цена од околу 32.000 евра. Третата погонска опција е 1.5 Turbo со 165 КС.
Дизел-понудата почнува со 1.6 CDTI со 110 КС за 24.438 евра, следи верзија со 136 КС, а потоа и две верзии на 2.0 CDTI, со 170 и 210 КС, при што најсилната изведба стандардно располага со погон 4х4 и автоматски менувач со 8 степени. Понудата од погонски единици кај комбито Insignia Sports Tourer е идентично со лимузинската изведба. Разликата во цената изнесува околу 1.600 евра.
Уште во основното ниво Insignia следуваат диодни предни светла, мултифункциски волан обложен со кожа, автоматски клима уред, радио 4.0 InteliLink и електрична паркирна сопирачка.
Основната линија потекнува од Monza Concept од Франкфурт 2013
Дизајнот потекнува од Monza Concept, прикажан на салонот во Франкфурт во 2013 година. Меѓуоскиното растојание продолжено за 92 милиметри во споредба со претходникот создава атлетска појава, во комбинација со кусите каросериски превиси напред и назад.
Insignia не беше единствениот модел на Opel што се подготвуваше за македонска премиера. Како големо изненадување на вечерта се одржа претпремиера на кросоверот Crossland X, за веднаш потоа да следи и наградна игра. За среќниот добитник: Викенд во Охрид, нова Opel Insignia за превоз. Секако дека настанот заслужи и соодветно музичко одбележување, со Белучи квартет, со познатиот Џон Илија Апелгрин.
